Eńbek departamenti kereksiz anyqtamany talap etip, múgedekterdi áýrege salǵan
20:26, 13 Qarasha 2018
QOSTANAI.QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblystyq departamenti múgedektikti belgileý boıynsha memlekettik qyzmet kórsetý kezinde múmkindigi shekteýli adamdardan mekenjaı anyqtamasyn zańsyz talap etý faktilerin anyqtady, dep habarlaıdy QazAqparat tilshisi departamentttiń baspasóz qyzmetine silteme jasap.
«Jyl basynan beri Eńbek jáne kóshi qon departamentine «múgedektikti belgileý» memlekettik qyzmetin alý úshin 6 myńnan astam adam barǵan. Olardan HQO-dan mekenjaı anyqtamasyn ákelýdi zańsyz talap etkeni anyqtaldy. Qazirgi zańnamaǵa sáıkes, ýákiletti organ óziniń aqparattyq júıelerinen kerekti maǵlumatty ózi ala alady», - dep habarlady departamentte.
Vedomstvonyń baspasóz qyzmeti atap ótkendeı, mundaı sanattaǵy adamdardyń óz betinshe qımyldaýy qıyn jáne anyqtama jınaý olarǵa aıtarlyqtaı kúsh túsirip, áýre-sarsańǵa salady.
«Qostanaı oblystyq QR Memlekettik qyzmet isteri jáne sybaılas jemqorlyqqa qarsy is-qımyl departamentiniń arqasynda zańsyz mekenjaı anyqtamasyn talap etý áreketi toqtatyldy», - dep habarlady vedomstvoda.