Eńbek daýlaryn sheshý: Kásipodaqtardyń róli kúsheıtiledi

ASTANA. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine eńbek daýlary men janjaldaryn sheshý tártibin ońaılatý boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasyn Parlament Májilisiniń depýtattary zań shyǵarý bastamasy tártibimen ázirledi.

Bul qujat eńbek janjaldaryn retteý jáne kelissózder protsesterin uıymdastyrý máseleleri boıynsha zańnamany jetildirý maqsatynda ázirlendi. Sonymen qatar, zań jobasynda kelissózderdi uıymdastyrý rásimin ońaılatý, kelisý komıssııalary ınstıtýtyn, eńbek tóreligin jáne eńbek daýlaryn sheshýdegi kásipodaqtardyń rólin kúsheıtý kózdelgen.

Zań jobasynda:

- kelisý komıssııasyn qalyptastyrý tártibin jáne onyń qyzmetin reglamentteýge;

-aqparattyq-kommýnıkatsııalyq tehnologııalardy qoldana otyryp, kelisý komıssııasynyń otyrysyn (qashyqtan) ótkizýge;

-kelisý komıssııasy aıqyndaıtyn sheshimniń oryndalý merzimin naqtylaýǵa;

-ujymdyq eńbek daýlary bolǵan kezde jumyskerlerdiń talaptaryn usyný rásimin ońaılatýǵa;

-eńbek tóreliginiń quramyn áleýmettik áriptestik jáne áleýmettik ári eńbek qatynastaryn retteý jónindegi úshjaqty komıssııa ókilderimen tolyqtyrýǵa;

-bir mezgilde ujymdyq eńbek daýlaryn sheshý tártibin buzǵany úshin jaýapkershilikti bekite otyryp, kásipodaqtardyń rólin kúsheıtýge baǵyttalǵan normalar usynyldy.

Májilis depýtaty Janat Omarbekovanyń aıtýynsha, zań jobasy eńbek qatynastary salasyndaǵy zańnamany jetildirýge jáne eńbek daýlarynyń aldyn alýdyń qoldanystaǵy júıesin damytýǵa baǵyttalǵan.

«Negizgi mindet – jumys berýshi men qyzmetkerlerdiń kelispeýshilikterin retteý jáne taraptar múddelerin eskere otyryp, ortaq ustanymǵa keltirý. Osy oraıda zań jobasynda kelisý komıssııalary men eńbek tóreligi ınstıtýtyn kúsheıtý, eńbek daýlaryn sheshýde kásiptik odaqtardyń rólin kúsheıtý usynylady. Zań jobasynda Qazaqstan Respýblıkasynyń Eńbek kodeksine jáne «Kásiptik odaqtar týraly» Zańǵa ózgerister men tolyqtyrýlar engizý eskerilgen», - dedi depýtat.