Eńbek daýlaryn retteý túıtkildi máselege aınaldy - Jambyl oblysy

TARAZ. QazAqparat – Sońǵy kezderi Jambyl oblysyndaǵy iri kásiporyndarda eńbek daýlary jıi baıqalýda. Aımaq basshysy Berdibek Saparbaevtyń tóraǵalyǵymen ótken apparat otyrysynda osy máselele týraly jan-jaqty talqylandy, dep habarlaıdy QazAqparat tilshisi oblys ákimdiginiń resmı saıtyna silteme jasap.

Aǵymdaǵy jyldyń 24 aqpanda Moıynqum aýdanyndaǵy «Jambyl óndiristik tsement kompanııasy» JShS jumysshylary eńbek jaǵdaılaryn jaqsartýdy jáne jalaqyny kóterýdi talap etken bolatyn. Sol sekildi, Lýgovoı jylqy zaýytynyń qyzmetkerleri aldyndaǵy bereshegi 100 mıllıon teńgege jetken. Memlekettik organdardyń aralasýynan keıin ǵana shıelenis rettele túsken. Qazirgi ýaqytta jylqy zaýyty qaryzynyń 85 mıllıon teńgesin tóledi. Qalǵan 15 mıllıondy kásiporyn basshylyǵy jumysshylarǵa jaqyn berýge ýáde etýde.

Apparattyq keńeste atalǵan máseleler boıynsha qalyptasyp otyrǵan ahýaldy oblystyq eńbek ınspektsııasynyń basshysy Qaırat Dosaev, Moıynqum aýdany ákiminiń mindetin atqarýshy Amangeldi Námetqulov, T.Rysqulov aýdanynyń ákimi Erbolat Sadyrqulov

baıandady.

Óńir basshysy olardyń esepterine kóńili kónshimeıtinin bildirdi.

«Nege aýdandyq ákimdikter jaǵdaıdy baqylaýda ustap, aldyn alý jumystaryn júrgizbeıdi? Nelikten biz másele týyndaǵannan keıin ǵana shuǵyl sharalardy qabyldaı bastaımyz? Oǵan deıin qaıda qalasyzdar? Aıtalyq, Myńaral aýylynyń ákimi atqarylǵan jumystar týraly esep bergende bári jaqsy, eshqandaı másele joq ekenin aıtqan.

Al, shyn máninde ol ótirik bolyp shyqty. Mundaı jaǵdaı tek Moıynqum aýdanynda ǵana emes. Basqa aýdandarda da jumys kóbine qurǵaq esep úshin ǵana júrgizilýde. Nátıjesinde sharýaǵa qadaǵalaý organdarynyń aralasýyna týra keledi», - dedi oblys ákimi.

Sonymen qatar, keńeste atap ótilgendeı, óńirdegi kásiporyndar men uıymdardyń 92 paıyzy ujymdyq sharttarmen qamtylǵan. Memorandýmnyń bekitilýimen barlyq ahýal ońalyp ketti dep aıtýǵa taǵy bolmaıdy. Eńbek janjaldarynyń aldyn alý jónindegi úshjaqty komıssııa tarapynan belsendi jumystar baıqalmaıdy. B. Saparbaev komıssııa kásipodaqtarmen jáne kásipkerlermen birlese jumys júrgizýi kerektigin alǵa tartty.

«Jergilikti memlekettik organdardyń mindeti – eńbek ujymdarynyń zańdy múddeleri men quqyqtaryn qorǵaý, kásiporyndar men uıymdarda olardyń menshik nysanyna qaramastan jalaqynyń kesheýildeý jaǵdaılary men faktileriniń aldyn alý bolyp tabylady.

Jaýapty tulǵalarǵa birinshi toqsannyń sońyna deıin ujymdyq sharttar men memorandýmdar jasasýdy aıaqtaýdy tapsyramyn», - dedi óńir basshysy.