«Eńbek» baǵdarlamasy: Semeıde 50 jobaǵa qarjylaı qoldaý kórsetildi

SEMEI. QazAqparat – Semeı qalasynda bıyl «Eńbek» baǵdarlamasy aıasynda jeke kásipkerlerdiń 50 jobasyna qarjylaı qoldaý kórsetildi, dep habarlaıdy QazAqparat tilshisi.

Qalalyq aqparat ortalyǵynyń málimetine súıensek, áleýmettik kásipkerlikti damytý maqsatynda dóńgelek ústel ótti.

Oǵan ákimdik qyzmetkerleri, joǵary oqý oryndarynyń ókilderi, jergilikti kásipkerler men jastar qatysty.

«Búgingi tańda shaǵyn jáne orta bıznesti damytý shahar ekonomıkasyn jaqsartýda mańyzdy ról atqarady. Búginde Semeıde 22 597 kásipker bar. Shaǵyn jáne orta bıznesti damytý nátıjesinde, 1649 jańa jumys oryn ashyldy. Osy rette «Jumyspen qamtýdyń jol kartasy 2025» memlekettik baǵdarlamasy sheńberinde jumystar qarqyndy júrgizilýde. Jyl basynan beri 545 jobaǵa qoldaý kórsetilip, onyń 385-i sýbsıdııalandy. Sýbsıdııa sommasy – 576,4 mln teńge», - dedi qalalyq kásipkerlik bóliminiń bas mamany Ázimhan Arın.

Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda jyl basynan beri 50 jobaǵa qoldaý kórsetilgen.