«Eńbek» baǵdarlamasy: Semeıde 218 adamǵa jeke kásibin damytý úshin grant berildi
Bul týraly qalalyq Aqparat ortalyǵynda ótken baspasóz konferentsııasy barysynda jumyspen qamtý jáne áleýmettik baǵdarlamalar bóliminiń basshysy Aıdar Samaev málimdedi.
Onyń aıtýynsha, baǵdarlamanyń birinshi baǵyty sheńberinde 227 adam qajetti mamandyqtar boıynsha qysqa merzimdi oqý oqydy. Bul kýrstar 9 oqý ornynda 9 mamandyq boıynsha júrgizilýde: slesar-santehnık, kran mashınısi, traktorshy, týrızm menedjeri, tiginshi, aspaz, kondıter, naýbaıshy, dánekerleýshi.
«Baǵdarlamanyń ekinshi baǵyty – buqaralyq kásipkerlikti damytý. Osynyń aıasynda 218 adamǵa jeke kásibin damytý úshin 121 mln teńge mólsherinde grant berildi. Grant iri qara ósirý, kondıterlik ónimderdi daıyndaý, tiginshilikpen aınalysý jáne taǵy da basqa jobalardy júzege asyrý úshin taǵaıyndalǵan», - dedi Aıdar Samaev.
Úshinshi baǵyt – halyqty jumyspen qamtý jáne eńbek resýrstaryn jumyldyrý arqyly eńbek naryǵyn damytý. Atalǵan baǵyt sheńberinde turaqty jumys oryndaryna 833 adam ornalastyrylǵan. Jumyssyz jastar ýaqytsha jastar tájirıbesine, áleýmettik jumys oryndaryna jáne qoǵamdyq jumystarǵa tartyldy.