Eń joǵary ball jınaǵan aqtóbelik túlek ІT mamany bolýdy armandaıdy

AQTÓBE. QazAqparat -Aqtóbe oblysy boıynsha Ulttyq biryńǵaı testileýden eń joǵary ball jınaǵan Alpamys Aqjol ІT mamany bolýdy armandaıdy, dep habarlaıdy QazAqparat tilshisi.

Bıyl Aqtóbe oblysy UBT boıynsha kórsetkishin jaqsartty.

Oblystyq bilim basqarmasynyń basshysy Lázzat Orazbaevanyń aıtýynsha, eń joǵary baldy №53 orta mektep túlegi Aqjol Alpamys jınady.

«Aqtóbe oblysy boıynsha 6669 túlektiń 5335-i testileýge qatysty. Ortasha ball oblys boıynsha 85,6 qurady, bul 2017 jylǵy kórsetkishten 3,2 balǵa jáne respýblıkalyq kórsetkishten 2,6 balǵa joǵary. Aımaq boıynsha eń joǵary 137 baldy Aqtóbe qalasyndaǵy №53 orta mektep túlegi Aqjol Alpamys jınady», - dedi Lázzat Orazbaeva.

Aıta keteıik, Aqjol Alpamys synaqty 23 maýsym kúni Q.Jubanov atyndaǵy Aqtóbe óńirlik memlekettik ýnıversıtetiniń ǵımaratynda tapsyrdy. Ol fızıka-matematıka baǵytyn tańdap, aldaǵy ýaqytta S.Demırel atyndaǵy ýnıversıtette ІT mamandyǵyn meńgerýdi josparlaýda.