Eń tómengi kórsetkishter Shymkent qalasy, Túrkistan jáne Ulytaý oblystarynda - Úkimet

NUR-SULTAN. QazAqparat - Premer-Mınıstr Álıhan Smaıylov Úkimettiń Tsıfrlyq keńsesinde ınvestıtsııalyq shtabtyń kezekti otyrysyn ótkizdi. Otyrysta negizgi kapıtalǵa jáne tikeleı sheteldik ınvestıtsııalar tartý boıynsha nysanaly ındıkatorlardy oryndaý qarqyny, sondaı-aq basqa da birqatar másele qaraldy, dep habarlaıdy QazAqparat.

Úkimettiń resmı saıtynyń málimetinshe, b ıylǵy 7 aıdyń qorytyndysy boıynsha negizgi kapıtalǵa salynǵan ınvestıtsııalar kólemi 6,9 trln teńgeni qurady. Jyljymaıtyn múlikpen operatsııalar, taý-ken ónerkásibi jáne munaı óndirý, kólik jáne qoımalaý, aýyl, orman jáne balyq sharýashylyǵy, energetıka jáne óńdeý ónerkásibi sııaqty salalar boıynsha aıtarlyqtaı ósim baıqalady.

Osy jyly negizgi kapıtalǵa quıylǵan ınvestıtsııalar boıynsha 4,5% deńgeıinde oń dınamıka baıqalyp otyr, degenmen 12 óńir belgilengen nysanaly ındıkatorlardy oryndamaǵan. Eń tómengi kórsetkishter Shymkent qalasy, Túrkistan jáne Ulytaý oblystarynda.

«Іri kompanııalar óndiriske ınvestıtsııa salyp, jańa jumys oryndaryn ashýǵa daıyn. Olarmen jumys istep, ınvestıtsııalyq kelisimsharttar jasaý, jańa jobalar boıynsha – salyq zańnamasynyń turaqtylyǵyna kepildik berý qajet. Oblystar men memlekettik organdardyń basshylyǵy ınvestıtsııa tartý jumystaryn kúsheıtip, bul máseleni erekshe baqylaýda ustaýy tıis», — dedi Álıhan Smaıylov.

I toqsannyń qorytyndysy boıynsha tikeleı sheteldik ınvestıtsııalar aǵynynyń 54%-ǵa oń dınamıkasy tirkelgen.

«Qazirgi kezde birqatar ınvestorlardyń elimizge óz óndiristerin kóshirý nıetimen baılanysty múmkindikter ashylýda. Mınıstrler men ákimder osy baǵytta týyndaıtyn máselelerdi jedel sheshý úshin bar kúsh-jigerin jumsasyn», — dedi Álıhan Smaıylov.

Otyrysty qorytyndylaı kele, Premer-Mınıstr memlekettik organdar men ákimdikter barlyq josparlanǵan ınvestıtsııalyq jobany iske qosý boıynsha túbegeıli sharalar qabyldaýy tıis ekenin atap ótti.