Eń qaýipti jol men kóshe qıylysy anyqtaldy
QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń málimetine qaraǵanda, ótken aıda eń kóp JKO Almaty qalasynda (463) bolǵan. Almatydaǵy Altynsarın jáne Abaı kósheleriniń qıylysy apattylyq eń kóp oryn alatyn jol bóligine aınalǵan, ol jerde 5 JKO tirkelip, 10 adam zardap shekti.
Joldaǵy ólim-jitim boıynsha Almaty oblysy aldyńǵy orynda, onda 54 adam jol apatynan qaza tapqan. Osy oraıda Almaty-Bishkek tas joly eń qaýipti ýchaske retinde tirkelgen kórinedi. Bul jolda 4 adamnyń qaza bolýyna ákep soqqan 4 JKO oryn aldy.
«Qarasha aıynda Qazaqstan Respýblıkasynyń Ákimshilik quqyq buzýshylyq týraly kodeksiniń 610-baby boıynsha (Kólik quraldary júrgizýshileriniń jol júrisi qaýipsizdigin qamtamasyz etýdiń belgilengen qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine ákep soqqan buzýshylyǵy) 5 943 adam jaýapkershilikke tartyldy, al jyl basynan bastap 58 871 adam jazalandy»,-delingen komıtet habarlamasynda.
QR QK 345-baby boıynsha (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) qarasha aıynda 216 azamat, al jyl basynan bastap 4 433 adam jaýapkershilikke tartyldy.
Aǵymdaǵy jyly elimizdiń joldarynda barlyǵy 16 332 JKO oryn alyp, sonyń saldarynan 23 384 adam zardap shegip, onyń ishinde 2 167 adam ajal qushty. Degenmen ótken jyldyń sáıkes kezeńimen salystyrǵanda jol kólik apattylyǵynyń deńgeıi 5,7 paıyzǵa tómendedi.