Eń boıshań polıtsııa qyzmetkeri Qaraǵandyda turady

QARAǴANDY. QazAqparat – Qazaqstandaǵy boıy eń bıik polıtsııa qyzmetkeri Qaraǵandyda turady. Aǵa leıtenant Damır Syzdyqovtyń boıy - 199 sm, dep habarlaıdy QazAqparat tilshisi.

Qaraǵandy oblysy PD arnaıy jumyldyrý daıyndyǵy basqarmasynyń ınspektory, aǵa leıtenant Damır Syzdyqov - Qazaqstannyń eń boıshań polıtseıi.

Ol sondaı-aq karateden sport sheberi jáne qoıan-qoltyq jekpe-jek boıynsha polıtsııa quramasynyń qataryna kiredi.

Qaraǵandylyq alyp polıtseıdiń aıtýynsha, onyń boıynyń uzyn bolǵanynyń bir ǵana kemshiligi bar – boıyna shaq keletin forma tabý qıyn.

«Maǵan eń úlken formany beredi, biraq onyń ózi tar bolyp jatady keıde. Negizinen, shalbarlary árqashan qysqa bolady, keı kezde tigý kerek bolsa, keıde tigin atelesine júginý kerek, birdeńe oılap tabamyn áıteýir. Boıymnyń uzyn ekenin maqtan tutamyn. Mektepte oqyǵanda synyptaǵy qatarda eń birinshi bolyp turatynmyn, al áskerde qyzmet etkende árqashan birinshi jáne árqashan oń qanatta boldym. Boıymnyń bıik bolǵanynan eshqandaı kemshilik ne qıyndyq kórgen emespin», - deıdi Damır.

Damır Syzdyqovtyń 2 joǵary bilimi bar. Sondaı-aq Otan aldynda boryshyn ótep kelgen. Qazir ol 29 jasta.

Quqyq qorǵaý organdarynda 3 jyl buryn jumys isteı bastaǵan. Atama ofıtser bolýǵa ýáde berdim, deıdi.

Onyń erekshe bıik boıy men qajyrly eńbegin basshylyq patrýldik polıtsııa polkinde qyzmet etken kezinde baıqaǵan.

Qazir Damır qyzmetkerlerdi arnaıy daıarlaý boıynsha nusqaýshy.

«Bizde arnaıy jumyldyrý daıyndyǵy basqarmasynda kil myqtylar jumys isteıdi, olardyń sporttaǵy jetistikteri aıtarlyqtaı. Damırdiń jattyǵýlaryn, buryn kásibı karatemen aınalysqanyn, basketbolmen aınalysqanyn baıqap, óz qatarymyzǵa aldyq. Qyzmetkerlerimizdiń barlyǵy jaramdy, sportqa beıim, fızıkalyq turǵydan daıyn bolýy kerek, sondyqtan olar kez kelgen ýaqytta daıyn. Ol jeke quramdy oqytýmen aınalysady», - dep atap ótti Qaraǵandy oblysy PD arnaıy jumyldyrý daıyndyǵy basqarmasynyń bastyǵy Rınat Súttibaev.

Damır Syzdyqov óz daǵdylaryn jetildirýdi esh toqtatpaıdy. Dúısenbiden senbige deıin sport zalǵa barady.

Ár jyldyń sońynda búkil jeke quram kásibı jaramdylyqqa keshendi synaqtan ótedi: júgirý, atý, kúsh jáne jaýyngerlik tehnıkalar.

Onda Damır únemi jaqsy nátıje kórsetedi.