Emmanıýel Makronnyń Ózbekstanǵa sapary: Eki el basshysy ne týraly ýaǵdalasty

<p>Samarqand qalasynda Ózbekstan prezıdenti Shavkat Mırzıeev pen Frantsııa prezıdenti Emmanıýel Makron shaǵyn quramda kezdesý ótkizdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

Ózbekstan basshysynyń baspasóz qyzmetinen málimdegendeı, eki el prezıdenti ózbek-frantsýz yntymaqtastyǵyn jan-jaqty arttyrý máselelerin talqylap, ekijaqty qatynasty strategııalyq áriptestik deńgeıine shyǵarýǵa ýaǵdalasty.

Sondaı-aq keıingi jyldary eki memleket arasynda san saladaǵy qarym-qatynastyń qarqyndy damyp kele jatqany atap ótildi. Taýar aınalymy men birlesken kásiporyndar sany artyp, perspektıvaly ınvestıtsııalyq jobalar portfeli 10 mlrd eýrodan asty. Frantsııanyń damý agenttigimen 1 mlrd eýroǵa baǵalanǵan strategııalyq yntymaqtastyq baǵdarlamasy júzege asyp jatyr.

Munymen qatar qos tarap «jasyl» energetıka, shıkizat óndirý jáne ony óńdeý, sýmen qamtamasyz etý, logıstıka, ınfraqurylymdy damytý, týrızm jáne basqa da salalardaǵy jańa iri jobalardy ilgeriletý jónindegi sharalardy talqylady.

Frantsııa prezıdenti Ózbekstannyń Ortalyq Azııa aımaǵynda odan ári nyq damýyna, respýblıkanyń Dúnıejúzilik saýda uıymyna qosylýyna jáne Eýroodaqpen keńeıtilgen áriptestik pen yntymaqtastyq týraly kelisimge taıaý arada qol qoıýyna qoldaý kórsetýge daıyn ekenin jetkizdi.

Kezdesý barysynda Ózbekstanda frantsýz tilin úırenýge degen qyzyǵýshylyqtyń artqany aıtyldy. Sáıkesinshe, taraptar Samarqand qalasynda Frantsýz Alıansynyń fılıalyn ashý usynysyn maquldady.

Buǵan qosa eki el basshylary Tashkent qalasynda ózbek-frantsýz joǵary oqý ornyn qurý isin jedeldetý jáne frantsýz tili oqytýshylaryn daıarlaý salasyndaǵy yntymaqtastyqty keńeıtý týraly ýaǵdalasty.