Emhanalardaǵy problema qalaı sheshiledi
- Máseleler áli de bar. Onyń ishinde negizgisi bastapqy medıtsınalyq-sanıtarlyq kómekke, ıaǵnı emhananyń qyzmetine turǵyndardyń kóńili tolmaı jatady. Sonyń arasynda tegin dári-dármekke, kezek máselesine, dárigerlerdiń bilimine qatysty suraqtar bar. Sondyqtan osyǵan júıeli túrde qaraý kerek. Mınıstr retindegi qyzmetimde emhanalardyń jumysyn jetildirýge kóńil bólip jatyrmyn, - dedi A.Álnazarova.
Onyń aıtýynsha, halyqtyń 80 paıyzy alǵashqy kómek alý úshin emhanalarǵa barady.
- Jumystyń durys júrýine Densaýlyq saqtaý mınıstrliginiń buıryqtary da eleýli túrde áser etedi. Ár óńirden kelgen aryzdardy qarasaq, negizinen 5-6 baǵyttaǵy problemalar aıtylǵan. Bul turǵyda normatıvtik-quqyqtyq aktilerdiń sapasyna qatysty revızııa jasadyq. Mınıstrlik buıryqtarynyń 11-ine qol qoıyldy, sondaı-aq taǵy 15-i bekitiledi. Atap aıtqanda, júıeni patsıentke baǵdarlap, onyń barlyq jaǵdaıyn jasaýǵa baılanysty buıryqtardy ózgerttik. Osy oraıda 2025 jyldan bastap buıryqtardyń kóbisi kúshine enedi, - dedi mınıstr.
Budan buryn habarlanǵandaı, 2024 jyldyń basynan beri Qazaqstanda emhanalarǵa 103 mln-nan astam qaralý tirkeldi. Bul 2023 jylmen salystyrǵanda 7%-ǵa ósýdi kórsetedi.
Aıta keteıik, Densaýlyq saqtaý mınıstri Aqmaral Álnazarova «Jibek Joly» telearnasynyń «Ýáde» baǵdarlamasyna suhbat berip, mindetti áleýmettik medıtsınalyq saqtandyrý júıesi, ana men bala ólimin azaıtý, densaýlyq saqtaý salasynda buıryqtardy ózgertý jáne basqa da mańyzdy máselelerge qatysty pikirin aıtty.