Emhanalarda jumys isteıtin medbıkelerdiń fýnktsııalary keńeıtilmek

ASTANA. QazAqparat – Emhanalarda jumys isteıtin meıirgerlerdiń fýnktsııalary keńeıtilmek. Bul týraly Bul týraly Parlament Májilisindegi Úkimet saǵatynda QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Aýylda medıtsınalyq kómektiń sapasyn jaqsartý úshin Dúnıejúzilik densaýlyq saqtaý uıymy maquldaǵan «Patsıentke baǵdarlanǵan tásil» medıtsınalyq-sanıtarııalyq alǵashqy kómektiń ozyq tájirıbeleriniń jobalary engizilip jatyr. Patsıentterdi qoldaý qyzmeti, aqparattandyrylǵan qoǵamdyq monıtorıng jáne halyqqa keri baılanys tetigi, ınfektsııalyq emes aýrýlardy erte anyqtaý, sondaı-aq durys tamaqtaný, er adamdardyń densaýlyǵyn jaqsartý, balany damytý jobalary keńinen taralyp jatyr», - dedi A. Ǵınııat aýyldaǵy densaýlyq saqtaý máselesin talqalýǵa arnalǵan Úkimet saǵatynda.

Sonymen qatar ol emhanalarda jumys isteıtin medbıkelerdiń fýnktsııalary keńeıtilgenin aıtty.

«Olar retsept jazýdan, qujattardy resimdeýden basqa, sozylmaly aýrýlary bar patsıentterdiń dınamıkalaryn qadaǵalaıdy, patsıentterdiń problemalaryn sheshýdi josparlaıdy. Bul qadamdardy barlyq óńirge taratý, engizý júzege asyrylyp jatyr», - dedi mınıstr.

Onyń sózine qaraǵanda, Almaty oblysy Eńbekshiqazaq aýdandyq emhanasy Dúnıejúzilik densaýlyq saqtaý uıymynyń Eýropalyq aımaǵyna múshe 53 memleket úshin medıtsınalyq-sanıtarııalyq alǵashqy kómek boıynsha demonstratsııalyq alań bolyp tanylǵan. Dúnıejúzilik densaýlyq saqtaý uıymy óziniń Eýropalyq aımaǵynyń úsh elinde, ıaǵnı Qazaqstanda, Ispanııada jáne Shvetsııada demonstratsııalyq alańdar ashty.

«Emhanalar deńgeıinde úzdik tájirıbelerdi engizýmen qatar, kópbeıindi ortalyq aýdandyq aýrýhanalar deńgeıinde medıtsınalyq kómek kórsetý tásilderi jetildirilip jatyr», - dedi vedomstvo basshysy.