Emhanaǵa onlaın tirkelý úshin ne isteý kerek

NUR-SULTAN. QazAqparat - Qazaqstandyqtar egov.kz elektrondy portaly jáne Telegram-bot arqyly emhanaǵa onlaın tirkele alady. Ótinish bir jumys kúni ishinde óńdeledi, dep habarlaıdy QazAqparat qala ákimdiginiń resmı saıtyna silteme jasap.

Onlaın tirkelý úshin egov.kz saıtyna ótinish jasap, «Medıtsınalyq kómek» qoıyndysynda «Alǵashqy medıtsınalyq-sanıtarlyq kómek kórsetetin medıtsınalyq uıymǵa tirkelý» qyzmetin tańdaý qajet. Odan soń «Qyzmetke onlaın tapsyrys berý» túımesin basý kerek. Ótinish sátti joldanǵannan keıin portalda «Suranys óńdelýde» mártebesi paıda bolady.

Emhananyń úıden nemese jumystan 15-20 mınýt jaıaý júretin jerde ornalasqany jón. Bul dárigerlerdiń qajet bolǵan jaǵdaıda úı-ishińizge jedel kómek kórsetýine, búkil otbasyńyzben bir dárigerge qaralýǵa múmkindik beredi.

Sonymen qatar, turǵylyqty jer boıynsha emhanaǵa Telegram-bot arqyly tirkelý múmkindigi bar, ol úshin Telegram messendjerinde @Kenes1414Bot-qa jazylyp, qarapaıym tirkeýden ótip, ary qaraı qyzmet túri: medıtsınalyq uıymǵa messendjer arqyly tirkelýdi, emhanany tańdaý qajet. Qyzmetti kórsetý merzimi – bir jumys kúni.

Botpen jumys isteý úshin eGov.kz-ke tirkelgen bolyp, uıaly telefonnyń nómirin portaldyń profıline baılanystyrý qajet. Telefondy tirkeý jáne baılanystyrý ETsQ paıdalana otyryp júzege asyrylady.

Sonymen qatar, iKOMEK109 biryńǵaı baılanys ortalyǵyna habarlasyp, azamattyń qalanyń belgili bir emhanasyna tirkelgeni týraly aqparat alýǵa bolady.