Emhana men aýrýhanalardaǵy kezekter tsıfrlandyrylady

ASTANA. QazAqparat – Densaýlyq saqtaý mınıstriniń orynbasary Beıbit Esenbaev emhanalar men aýrýhanalardaǵy uzynsonar kezek máselesin sheshýdiń joldaryn atady, dep habarlaıdy QazAqparat tilshisi.

«Búgingi tańda densaýlyq saqtaý júıesinde kóptegen beıresmı kezekter bar. Patsıent óz kezeginiń qashan keletinin árdaıym bile bermeıdi. Mysaly, ekstrakorporaldyq uryqtandyrý (EKU) kvotasyn alý, býyndardy aýystyrý jáne taǵy sol sııaqty. Osy oraıda medıtsınalyq mekemelerdegi kóptegen beıresmı kezekter tsıfrlandyrylady. Osylaısha tsıfrlyq servıster arqyly halyqty aqparattandyrý ashyq bolady»,– dedi Beıbit Esenbaev ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, patsıentterge keıbir medıtsınalyq qyzmetter boıynsha aqparat SMS habarlama arqyly jetkiziledi.

Atap aıtqanda:

1) patsıenttiń statsıonardan shyǵarylǵandyǵy týraly;

2) ambýlatorııalyq dári-dármekpen qamtamasyz etý sheńberinde retsept jazyp berý;

3) júkti áıelderdi josparly emdeýge jatqyzý merzimi;

4) júkti áıelder úshin josparly qarap-tekserýdiń josparlanǵan kúni týraly;

5) medıtsınalyq uıymǵa tirkelýdiń ózgerýi týraly.