Embi polıgony aýmaǵy aýyl sharýashylyǵy maqsatynda paıdalanylady

ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «1995 jylǵy 20 qańtardaǵy QR men RF arasyndaǵy Embi polıgonyn paıdalaný jáne jalǵa berý sharttary týraly kelisiminiń jáne 1996 jylǵy 18 qazandaǵy Qazaqstan Úkimeti men Reseı Úkimeti arasyndaǵy Embi synaq polıgonyn jaldaý týraly sharttyń qoldanysyn toqtatý jónindegi sharalar týraly QR men RF arasyndaǵy hattamany ratıfıkatsııalaý týraly» zań jobasyn maquldady, dep habarlaıdy QazAqparat.

«Hattamaǵa 2016 jylǵy 20 qazanda Máskeýde qol qoıyldy. Qujatta Embi synaq polıgonyn jaldaý jáne paıdalaný tártibin retteıtin halyqaralyq sharttardyń qoldanysy toqtatylady. Sondaı-aq Reseıge ýaqytsha paıdalanýǵa berilgen jer telimderin, jyljymaly nemese jyljymaıtyn múlikterdi qabyldaý jónindegi qajetti sharalardy júrgizý kózdelgen», - dedi QR Qorǵanys mınıstriniń orynbasary Talǵat Muhtarov zań jobasy boıynsha baıandamasynda.

Onyń sózine qaraǵanda, polıgonnyń jer ýchaskeleri ary qaraı paıdalaný úshin jaramdy jaǵdaıda qaıtarylady. Reseı tarapynan polıgondy paıdalaný boıynsha tıisti mindetterin oryndaýyna qatysty shaǵymdar joq.

«Polıgondy jaldaýdan shyǵarý aımaqtyq ekonomıkalyq damýǵa qolaıly áser etedi dep esepteımiz. Onyń ishinde qaıtarylǵan jerlerde ary qaraı paıdaly qazbalardy barlaý, aýyl sharýashylyǵymen aınalysatyn kásipkerlerdiń, uıymdardyń múddesinde paıdalanýǵa bolatynyn atap ótý qajet. Budan basqa, polıgonnyń ýchaskeleri Aqtóbe oblysyndaǵy áleýmettik mańyzy zor ınfraqurylymdyq jobalardyń qurylysy úshin paıdalanylýy múmkin», - dedi Qorǵanys mınıstriniń orynbasary.

T. Muhtarov atalǵan polıgon ıadrolyq synaq alańy sanatyna jatpaıtynyn, sondyqtan da turǵyndar men jergilikti bılik organdary tarapyna qandaı da bir aýrýlardyń týyndaýyna baılanysty shaǵymdar túspegenin atap ótti.