Eljana Tanıeva Olımpıadada kórkem gımnastıkadan el namysyn qorǵaıdy
133.40 upaımen jarystyń jeńipmazy atanǵan qazaqstandyq sportshy osylaısha Parıj Olımpıadasynyń joldamasyna qol jetkizdi.
Saıysta ekinshi orynǵa ózbekstandyq Tahmına Ikromova, úshinshi orynǵa japonııalyq Reına Matsýsaka jaıǵasty.
«Búgin maǵan Olımpıada lıtsenzııasy buıyrdy. Bul — óte úlken eńbek. Osy jeńistiń artynda turǵan barlyǵyna alǵysymdy bildiremin! Qoldaý kórsetken jankúıerlerge rahmet! Meniń bul saıystaǵy eń myqty qarsylasym — ózim. Óz-ózimdi durys baǵyttaý, durys jigerlendirý arqyly Olımpıada joldamasyna qol jetkizdim dep esepteımin», — dep málim etti Eljana Tanıeva jarystan keıin.
Sonymen qatar, taǵy bir qazaqstandyq sportshy Aıbota Ertaıqyzy Azııa chempıonatyndaǵy kópsaıysta 5-shi oryn alyp, taspa jáne urshyqpen jattyǵýda fınalǵa shyqty.
Fınaldyq jarystar erteń, ıaǵnı 4 mamyr kúni ótedi.
Eske sala keteıik, sary qurlyq básekesine barlyǵy 17 elden kelgen 90-nan astam sportshy qatysyp jatyr.
Qosa ketsek, Tokıo Olımpıadasynda el namysyn Alına Ádilhanova, oǵan deıin Rıo-de-Janeıroda Sabına Áshirbaeva, Londonda Anna Alıabeva, Beıjiń men Afınada Álııa ıÝsýpova qorǵaǵan edi.
Eń joǵary nátıje Álııa ıÝsýpovaǵa tıesili — 2004 jyly kópsaıysta 4-oryn jáne 2008 jyly urshyq jattyǵýynda 4-oryn.