Eljan Birtanovtyń advokaty sýdıany protsesten shettetýdi surady

NUR-SULTAN. QazAqparat – Densaýlyq saqtaý mınıstrliginiń burynǵy basshysy Eljan Birtanovtyń advokaty Nurlan Beısekeev sýdıa Ibragım Álkenovtiń protsesti júrgizýine taǵy da qarsylyq bildirdi. Ol talaby maquldanbady, dep habarlaıdy QazAqparat tilshisi.

Qorǵaýshynyń aıtýynsha, bul joly qarsylyq bildirýine sýdıanyń zardap shegýshi taraptyń ókilin isten shettetý týraly ótinishten bas tartqany sebep bolǵan.

Qorǵaýshy Erjan Birtannyń sózine qaraǵanda, Asqar Aqbaev – Qazaqstannyń Densaýlyq saqtaý mınıstrligi men Ericsson Nicola Tesla kompanııasynyń arasyndaǵy kelisimshartqa qol qoıǵan adamnyń biri.

Sondyqtan zardap shegýshi taraptyń ókili retinde emes, kýáger retinde ǵana protseske qatysa alady.

Qorǵaýshy taraptyń ótinishin qaraǵan sýdıa bul talapty qanaǵattandyrmaı tastady.

«Sýdıa Álkenovti bul isti qaraýdan shettetýge negiz bolatyn sebep kórmedim. Óıtkeni buǵan deıin de qorǵaýshy tarap dál osyndaı talap qoıǵan bolatyn. Aqbaevtan kýáger retinde jaýap alyp, zardap shegýshi taraptyń ókili retinde qatystyrmaý týraly ótinish túsirgen. Sot bul jaıt sýdıa Álkenovti isti qaraýdan shettetýge negiz bola almaıdy dep esepteıdi», - dep túsindirdi №2 Saryarqa aýdandyq sotynyń sýdıasy Sabyrjan Kárimov.

Búgin Birtanov isine qatysy bar aǵylshyn tilindegi qujattardy orysshaǵa aýdaratyn maman tańdalýy kerek bolǵan.

Advokat Nurlan Beısekeev sýdıa Ibragım Álkenovtiń aýdarmashyǵa kásibı biliktiligine qatysty suraq qoıýyna tyıym salǵanyna da narazylyq bildirdi.

Aıtýynsha, sýdıanyń advokattarǵa iske qatysty qujattardy aǵylshyn tilinen orysshaǵa aýdarǵan mamannyń biliktiligine qatysty suraq qoıýyna tyıym salýy qylmystyq-protsessýaldyq zańnamaǵa qaıshy.

Ótken otyrysta aýdarmashy eks-mınıstr men burynǵy vıtse-mınıstr Oljas Ábishevtiń advokattary aýdarmashyny suraqtyń astyna alyp, ol iske qatysýdan bas tartqan bolatyn.

Osyny alǵa tartqan sýdıa advokattardyń aýdarmashyǵa kásibı biliktiligi týraly suraq qoıýyna tyıym salǵan.

Eske salsaq, burynǵy densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.

Tergeý materıaly boıynsha, Eljan Birtanov pen onyń orynbasary Oljas Ábishevke Ericsson Nicola Tesla kompanııasynyń qyzmetin paıdalaný kezinde «laýazymdyq ókiletin teris paıdalaný» arqyly memleketke 1,5 mlrd teńgeniń shyǵyny keltirdi degen aıyp taǵylyp otyr.

Al bıyl 12 mamyrda sot Eljan Birtanovqa qatysty qylmystyq isti toqtatýdan bas tartty.