Eljan Birtanovqa sot úkimi qalaı taǵaıyndaldy - sýdıa túsindirmesi
«Eljan Birtanovqa 2 epızod boıynsha aıyp taǵylǵan edi. Birinshisi – laýazymdyq ókilettikterdi asyra paıdalaný, sanıtarlyq avıatsııanyń áýe kemesin qoldaný. Bul epızod boıynsha ol aqtaldy, óıtkeni sot onyń áreketinen QR QK 361-babynyń 3-bóliminde kózdelgen qylmystyq quqyq buzýshylyqty tapqan joq. Ekinshi epızod – Eljan Birtanov Oljas Ábishevpen birge Densaýlyq saqtaý mınıstrligin tsıfrlandyrý boıynsha jumys istemeıtin platformany qabyldap, oryndalǵan jumystar aktisine qol qoıǵan, al is júzinde bul jumys oryndalmaǵan. Olardyń zańsyz áreketiniń saldarynan 1,3 mlrd teńge bıýdjet qarajaty horvatııalyq kompanııanyń shotyna aýdaryldy, sol arqyly úshinshi tulǵalardyń paıdasyna ókilettikti asyra paıdalaný faktisi dáleldendi. Bul – memleket úshin úlken shyǵyn», - dedi sýdıa.
I. Álkenovtyń aıtýynsha, olardyń kinási qylmystyq is materıaldary, saraptama qorytyndylary jáne kýágerler túsiniktemeleri arqyly dáleldendi.
«Qazirgi ýaqytta platforma jumys istemeı tur. Sot qylmystyq istiń osy epızody boıynsha sottalýshylardy kináli dep taný úshin qaralǵan dáleldemeler jıyntyǵyn jetkilikti dep sanaıdy. Sot jaza taǵaıyndaý kezinde E. Birtanovtyń kámeletke tolmaǵan 3 balasy, Ábishevtiń múgedektigi bar balasy bar ekenin eskerdi. Memleketke materıaldyq zalal keltirgen úshinshi tulǵalarǵa aýdarylǵan aqshalaı qarajatty sottalýshylar tike urlaǵan joq. Biraq, bul aýdarym sottalǵandardyń qylmystyq áreketi saldarynan júrgizildi. Joǵaryda kórsetilgen mán-jaılardy eskere otyryp, sot bas bostandyǵyn shekteý túrindegi jaza taǵaıyndaýdy uıǵardy», - dedi Ibragım Álkenov.
Buǵan deıin habarlaǵanymyzdaı, búgin Saryarqa aýdanynyń №2 sotynda burynǵy densaýlyq saqtaý mınıstri Eljan Birtanov pen onyń orynbasary Oljas Ábishevtiń isine qatysty sot úkimi shyqty.
Eske sala ketsek, burynǵy densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.
Tergeý materıaly boıynsha, Eljan Birtanov pen onyń orynbasary Oljas Ábishevke «Ericsson Nicola Tesla» kompanııasynyń qyzmetin qoldaný kezinde «laýazymdyq ókiletin teris paıdalaný» arqyly memleketke 1,5 mlrd teńge shyǵyn keltirdi degen aıyp taǵylǵan.
Buǵan deıin prokýror Baýyrjan Shekenov sottaǵy jaryssóz kezinde densaýlyq saqtaý mınıstrliginiń burynǵy basshysy Eljan Birtanovty 6 jylǵa bas bostandyǵynyn aıyrýdy suraǵan edi.