Eljan Birtanov Otyrar aýdanyndaǵy naýqastarmen kezdesti
Mınıstr óńirdegi medıtsına salasynda atqarylyp jatqan jumystarmen tanysyp, aýdandardaǵy medıtsına qyzmetkerlerimen pikir almasty.
Densaýlyq saqtaý mınıstri Eljan Birtanov jumys sapary barysynda tarıhı mańyzy bar Otyrar aýdanyna bardy. Aýdandyq aýrýhanany aralap, naýqastarmen kezdesti. Emdeý mekemesi aýdandaǵy jalpy elý myńǵa jýyq turǵynǵa qyzmet kórsetedi. Aýrýhana sońǵy zamanaýı qural jabdyqtarmen qamtamasyz etilip, 100 paıyz tsıfrlandyrý júıesine kóshken. Tsıfrlandyrý salasyn odan ári jetildirý men ońtaılastyrý maqsatynda 190 monoblok satyp alynyp, qazirgi tańda barlyq aýyldy jerlerdegi medıtsınalyq qyzmetkerlerge paıdalanýǵa berilgen.
Naýqastar «Damý Med» mobıldi qosymshasy arqyly dárigerge elektrondy túrde, úıden shyqpaı-aq kezekke qoıylady. Jáne, kerekti málimet aýdandyq aýrýhana ǵana emes, elimizdegi barlyq klınıkalardyń bazasynda saqtaýly turady.
Sonymen qatar, aýdandyk aýrýhana zerthanasy da ortalyqtandyrylǵan. Ondaǵy saraptamalar avtomattandyrylǵan apparattarda jasalady. Bul óz kezeginde tekserýdiń sapasyn arttyryp, qate nátıje berýdi boldyrmaıdy.
Eljan Birtanov aýdanda QR Prezıdenti tapsyrmasyna sáıkes, densaýlyq saqtaý salasyn tsıfrlandyrý arqyly medıtsınalyq kómektiń qoljetimdiligi men sapasyn arttyrý isiniń júzege asyp jatqandyǵyn atap ótti. Jergilikti aýrýhanada «Karl Stors-Endoskope» vıdeolaparaskop apparaty da qoıylǵan. Zamanýı qural-jabdyq otadan keıin tez saýyǵýǵa múmkindik beredi. Bul aýdandaǵy medıtsınalyq kómektiń sapasyn jáne qol jetimdiligin arttyryp otyr.
Aýrýhanada sonymen qatar emdelýshini qoldaý jáne ishki aýdıt qyzmetteri uıymdastyrylyp, arnaıy senim telefony qurylǵan. Jergilikti dárigerler shet memleketterde de biliktilik arttyryp keledi. Qazirgi tańda Otyrar aýdandyq aýrýhanada 800-ge jýyq qyzmetker jumys isteıdi. Patronajdyq qyzmettiń ýnıversaldy – progressıvti modelin qoldaný arqasynda bala ólimi tómendegen.