Eljan Birtanov Arysta jaralanǵan 7 jasar bala týraly: Jazylady degen úmit bar

NUR-SULTAN. QazAqparat - Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstri Eljan Birtanov Arys apaty kezinde aýyr jaraqat alǵan Aıan Sháripbaevtyń jaǵdaıy týraly tolyqqandy aqparat berdi, dep habaralıdy QazAqparat tilshisi.

Densaýlyq saqtaý mınıstri Aıannyń Arys qalasyndaǵy apat kezinde kólik astyna túsip, jaraqat alǵanyn eske saldy.

«Aıan Sháripbaevtyń dıagnozy - aýyr mı jaraqaty. Arys qalasynda kólik astyna túsken bolatyn. Birinshi kúni Shymkentte ota jasalǵan. Keıin ońalmaǵan soń Nur-Sultanǵa aldyrdyq. Jeti jasar Aıannyń jaǵdaıy birinshi kúnnen beri óz baqylaýymda. Qajetti mamandardyń bári kúndelikti konsılıým jasap, maǵan aqparat berip otyr», - dedi ol.

Eljan Birtanov Aıan Sháripbaev jansaqtaý bóliminde jatqan №2 qalalyq aýrýhananyń elimizdegi eń ozyq medıtsınalyq nysan ekenin aıtyp, balany jazyp alýǵa bolatynyna sendirdi.

«Ol nysan neırohýrıýrgııalyq em jasaýǵa qajetti zamanaýı quraldardyń barlyǵymen jabdyqtalǵan. Mamandary da óte bilikti. Balanyń qazirgi jaǵdaıy óte aýyr bolǵanymen, sapaly medıtsınalyq kómektiń arqasynda jazylyp ketedi degen úmit bar», - dedi mınıstr.

Eske sala keteıik, Arystaǵy jarylysta aýyr jaraqattanǵan eki bala Nur-Sultanǵa jetkizilgen bolatyn. Mınıstrdiń aıtýynsha, elordaǵa aldyrylǵan ekinshi balanyń jaǵdaıy ońalǵan.

«Ekinshi balanyń jasy 11-de . Onyń jaǵdaıy ońaldy deýge bolady. Qazirgi tańda esin biledi. Jaraqaty jazylyp, boı túzep keledi», - dedi ol.

Aıta ketsek, munyń aldynda densaýlyq saqtaý mınıstri Eljan Birtanov Arysta jańa emhana men aýrýhana salynatynyn aıtqan bolatyn. Sondaı-aq, Arystaǵy jarylystan zardap shekken eki adam áli jansaqtaý bóliminde jatyr.