Elvıs Preslıdiń jalǵyz qyzy qaıtys boldy

ASTANA. QazAqparat – Amerıkalyq ánshi Lıza Marı Preslı – Elvıs Preslıdiń jalǵyz qyzy 54 jasynda qaıtys boldy. Bul týraly ánshiniń anasy Prıstsılla Preslıdiń málimdemesine silteme jasaǵan People jýrnaly jazdy, dep habarlaıdy QazAqparat.

«Júregim qars aıryla sulý qyzym Lıza Marıdiń aramyzdan ketkeni týraly qaıǵyly habarmen bólisýime týra keledi», - dedi ánshiniń anasy jýrnalǵa bergen suhbatynda.

Buǵan deıin TMZ portaly derekkózderge silteme jasaı otyryp, ánshiniń júregi toqtap, jasandy komada jatqanyn habarlaǵan bolatyn.

Jýrnaldyń málimetinshe, Preslı óziniń óner jolynda úsh albom shyǵardy: To Whom It May Concern (2003), Now What (2005) jáne Storm&Grace (2012). Uzaq ýaqyt boıy ol Elvıs Preslı qaıyrymdylyq qoryn basqardy.

Aıta ketsek, Preslı osy aptada «Altyn globýs» premııasynyń marapattaý rásimine qatysqan. Onda Elvıs Preslıdiń ómiri týraly baıandaıtyn «Elvıs» (2022) dramalyq fılmindegi basty er adam rólin somdaǵan akter Ostın Batler syılyqqa ıe boldy.

Foto: JAMES WHITE/SHUTTERSTOCK