Eltańba avtory men belgili hırýrg Qyzylorda oblysynyń Qurmetti azamaty atandy
Jıynǵa qatysqan aımaq basshysy Nurlybek Nálibaev Ata zańdy ardaqtaý – bolashaqqa batyl qadam basqan árbir azamattyń asyl paryzy ekenin jetkizip, barsha Syr jurtyn Konstıtýtsııa kúnimen quttyqtady.
«Konstıtýtsııa – qaǵaz júzindegi qujat emes, ol - eldiń, halyqtyń, árbir azamattyń ómir súrý erejesi, memlekettiliktiń irgesin bekitip, halyqaralyq keńistikte udaıy órkendeýin qamtamasyz etetin negiz.
Osy jyldyń elimizge túbegeıli ózgeris ákelgenin jaqsy bilesizder. El Prezıdentiniń tapsyrmasymen Qazaqstan damýdyń jańa jolyna tústi. Naýryz aıynda Memleket basshysy Qasym-Jomart Toqaev el damýy úshin máni zor saıası reformalar jarııalady. Bul óz retinde eldiń basty zańy – Konstıtýtsııaǵa birqatar ózgerister ákelýdi talap etetini sózsiz. Osylaısha, bıylǵy 5 maýsymda respýblıkalyq referendým ótkizilip, Qazaqstan Ata Zańynyń 33 babyna 56 ózgertý engizildi « , - dedi Nurlybek Nálibaev.
Merekelik jıynda Rámizder merekesiniń 30 jyldyǵy men mereıli seksen jasy qatar kelgen Memlekettik Eltańba avtory Jandarbek Málibekov pen alpys jasqa jetken bilikti dáriger, 8000-ǵa jýyq ota jasaǵan hırýrg, qoǵam qaıratkeri Bolatbek Baımahanovqa «Qyzylorda oblysynyń Qurmetti azamaty» ataǵy tabystaldy.
«Týǵan jerime kelip, halyqtyń qurmetine bólenýden artyq baqyt joq. Elimizge adal qyzmet etýimiz kerek. Baıqaǵanym, Qyzylordanyń óńi ózgerip, kelbeti kelisip, jańa zaman talabyna saı ónip ósip jatyr. Munyń bári týǵan jerge qyzmet etetin azamattardyń arqasy. Syr eli órleı bersin, mereke qutty bolsyn», - dedi Jandarbek Málibekov.
Saltanatty is-sharaǵa jınalǵan qaýym qarapaıymdylyqty tý etken qos azamatqa qurmet kórsetip, ystyq yqylasyn qoshemetpen bildirdi.
Sondaı-aq, aımaq damýyna súbeli úles qosyp, aıanbaı etken etken birqatar azamattarǵa Qyzylorda oblysy ákimdiginiń Qurmet gramotasy men Alǵys hat tabystaldy.
Arnaıy keshte aımaqtyń óner maıtalmandary kópshilikke merekelik kóńil-kúı syılady.