Elsııar Qanaǵatov: Ádildiń nátıjesi – short-trektegi tarıhı jetistik

NUR-SULTAN. QazAqparat – QR Ulttyq olımpıada komıteti sport dırektsııasynyń dırektory Elsııar Qanaǵatov qysqy Olımpıadadaǵy short-trekshi Ádil Ǵalıahmetovtyń nátıjesine pikir bildirdi, dep habarlaıdy QazAqparat.

23 jastaǵy Á.Ǵalıahmetov eresekter arasyndaǵy Olımpıadaǵa alǵash ret qatysyp, birinshi múmkindiginde-aq fınalǵa joldama aldy.

Keshe ol short-trekten 1500 metrge júgirip, 8-orynǵa taban tiredi.

«Keshe bizdiń qurama úshin jaqsy kún boldy dep aıta alamyz. Ádil Ǵalıahmetov jekeleı synda 1500 metrde jaqsy nátıje kórsetip, bárimizdi qýantyp, aqtyq saıysqa shyqty. Aqtyq saıysqa shyqqan sportshylardyń deńgeıin saraptap qarasaq, álemniń eń myqtylarynyń, talaı medalǵa ıe bolyp júrgen sportshylardyń arasynda 20-dan jańa asqan Ádil balamyzdyń bolýy – qazaq eli úshin qýanyshty kórinis boldy», - dedi E. Qanaǵatov ZOOM-konferentsııada.

Óz sózinde spıker qazaqstandyq jattyqtyrýshy Mádiǵalı Qarsybekovtyń eńbegin erekshe atap ótti.

«Short-trektiń qandaı sport ekenin bilesizder. Ádil alǵa ozyp shyqqanda bárimizdiń júregimiz tarsyldady. Biraq sporttyń eń sońǵy kezeńderi asa mańyzdy. Sondyqtan, osyndaı nátıjemen shyn júrekten quttyqtaımyz, bul - short-trektegi tarıhı jetistik. Bul jerde jattyqtyrýshy Mádiǵalı Qarsybekovtyń eńbegin atap ótkim keledi. Qazaqstandaǵy short-trekti damytyp, basynan bastap, aqyryna deıin jumys atqaryp kele jatyr. Iá, bul jumys ońaı emes. Alyp memleketter ishinde jattyǵýshylarmen qarym-qatynas ornatyp, jaqsy jattyqtyrýshylardy keńesshi retinde komandaǵa tartý da ońaı emes. Al endi jalpy short-trekte áli de jaqsy jarystarymyz bar. Soǵan bárimiz jankúıer bolaıyq», - dedi E. Qanaǵatov.

Buǵan deıin short-trekshi Ádil Ǵalıahmetov suraqtarǵa jaýap berip, áli de tájirıbe jınaqtaý keregin aıtqan edi.

«Meniń tájirıbem jetpeı qaldy dep oılaımyn, óıtkeni short-trektiń óz erekshelikteri bar. Qarsylastar basyp ozǵanda úlken jyldamdyqpen óte shyǵady. Oǵan iliný úshin ózińe de jyldamdyqty arttyryp, sál shetke shyǵý kerek. Bálkim osyny jasaýǵa tájirıbem jetpegen shyǵar, endi jyldamdyq arttyraıyn desem, meni basyp ozyp ketkender kóp boldy. Bári óz kezegimen jáne ár oıyn saıyn sheberligim shyńdala túsedi», - dedi sportshy.

Erteń sportshy 500 metrlik júgirý jarysyna qatysady.