Elshilikke jetkende úıimizge kelgendeı boldyq – Ýkraınadan oralǵan otandasymyz

NUR-SULTAN. QazAqparat – Ýkraına shekarasynan ótip, Polshaǵa jetken bir top Qazaqstan azamaty elge oraldy. Bul elimizdiń syrtqy ister mınıstrliginiń qazaqstandyqtardy evakýatsııalaýdaǵy ekinshi legi. Ýkraınadan elge aman saý oralǵandardyń qatarynda Janar Qadyrbekova da bar. Elorda áýejaıynan túse sala jerlesimiz óz áserimen bólisti, dep habarlaıdy QazAqparat tilshisi.

«Kıevke emdelýge barǵanbyz, protez saldyrmaq bolyp. Tisimdi emdetip bolǵannan keıin bizge elge qaıtatyndar elshilikke jınalý kerek degen habar jettik. Baqytymyzǵa qaraı, taksı tez tabyldy. Jaıshylyqta 300 grıven suraıtyn taksıstke 1000 grıven berip, tez jetkizýin suradyq. Bizdi aman saý elshilikke apardy. Elshilikke jetkende úıimizge kelgendeı boldyq. Keýdemdi maqtanysh kernedi», - dedi Janar Qadyrbekova.

Onyń aıtýynsha, Qazaqstannyń Ýkraınadaǵy elshiliginiń qyzmetkerleri otandastarymyzǵa kómektesip, únemi baılanysta bolǵan.

«Elshilik qyzmetkerleri kúni, túni kómektesti. Ýkraına halqy óte qaıyrymdy, ashyq jandar. Ýkraındyqtarǵa beıbit zaman tileımin. Árıne, jol aýyrǵa soqty. Táýligine 90 shaqyrym jol júrdik. Jergilikti halyq tamaǵyn usynyp, shaıǵa deıin berdi», - deıdi ol.

Buǵan deıin habarlaǵanymyzdaı Ýkraınadaǵy Qazaqstan azamattarynyń ekinshi legi elordaǵa keldi.

Sondaı-aq, QR SІM Ýkraınadan Polshaǵa jetken 74 qazaqstandyq elge qaıtý úshin kelesi reısti kútip otyrǵany týraly habardar etti.