Elshilik Túrkııadaǵy jer silkinisi kezinde qazaqstandyqtarǵa jan-jaqty qoldaý kórsetti

ASTANA. QazAqparat - Túrkııadan arnaıy ushaqpen kelgen Qazaqstan azamattarynyń arasynda farmatsevt Ermek Bısenbaev pen Elena Lı de boldy. Olar Gazıantepke issaparmen barǵan. Oqıǵanyń kýágerleri kórgenderin jan-jaqty aıtyp berdi. Qazaqstan halqy Qazaqstan Respýblıkasynyń Túrkııadaǵy Elshiliginiń qyzmetkerlerine jáne jeke elshi Erkebulan Sápıevke de qoldaý kórsetkeni úshin alǵysyn bildirdi, dep habarlaıdy QazAqparat tilshisi.

«Biz farmatsevtıkalyq kompanııadanbyz. Gazıantepke issaparmen bardyq. Barlyǵy kóz aldymyzda boldy, mundaı jer silkinisin ómirimizde birinshi ret kórdik. Qudaıǵa shúkir, osy ýaqyt ishinde elshilik qyzmetkelerimen baılanysta boldyq. Olar bizge jan-jaqty qoldaý kórsetti. Qazaqstannyń Túrkııadaǵy Elshiligine alǵysymyzdy bildirgimiz keledi. Gazıantepke elshi Erkebulan Sápıevtiń ózi kómekshisimen birge keldi. Olar bizdiń Tótenshe jaǵdaılar mınıstrliginiń delegatsııasymen birge boldy, olardy qarsy aldy, bizdi evakýatsııalaýdy uıymdastyrdy. Ol jerde reıster toqtatyldy. Biz sonda qansha bolatynymyzdy bilmedik. Biraq Elshiligimizdiń arqasynda arnaıy ushaqpen usha aldyq», - dedi farmatsevt Ermek Bısenbaev.

Elena Lıdiń aıtýynsha, jer asty dúmpýin sezgennen keıin bes farmatsevtten turatyn top dereý qujattaryn jınap, kıinip, kóshege júgirip shyqqan.

«Biz qonaq úıde boldyq. Shyndyǵynda, biz túnde kelgendikten, ahýaldy birden túsine qoımadyq. Bizdiń komandanyń bir bóligi Almatydan, bir bóligi Ámirlikten ushyp keldi. Qatty sharshadyq. Kóptegen adamdar sábılerimen jalańaıaq dalada júrdi. Qar eki saǵattan astam ýaqyt jaýdy. Barlyǵy syrtta turyp, jer asty dúmpýiniń basylýyn kútip turdy», - dep bólisti Elena Lı.

Buǵan deıin elordaǵa Qazaqstan azamattary mingen arnaıy reıs kelgeni habarlanǵan bolatyn. Túrkııadan 16 qazaqstandyq pen eki Qyrǵyzstan azamaty kelgen.