Elshilik qyzmetkerleri Ýkraınadan kele jatqan júk kólikteriniń júrgizýshilerine kómektesti

BRıANSK. QazAqparat - Qazaqstannyń Reseıdegi Elshiligi Ýkraınadan elimizge kele jatqan júk kólikteriniń júrgizýshilerine kómektesti, dep habarlaıdy QazAqparat QR Syrtqy ister mınıstrligine silteme jasap.

Ýkraına aýmaǵynda bastalǵan áskerı shıeleniske baılanysty qazaqstandyq alysqa qatynaıtyn kólik júrgizýshileri qıyn jaǵdaıǵa tap boldy.

«Ýkraınadan Qazaqstanǵa kele jatqan 10 júk kóligin Reseı shekarashylary Brıansk oblysyndaǵy Troebortnoe ótkizý pýnkti aýmaǵynda toqtatty. Belgili sebeptermen olardyń keri qaıtýǵa múmkindikteri bolmaǵan.

Logıstıkalyq qaqpanǵa 11 júrgizýshi túsip qaldy: olardyń jeteýi Qazaqstan azamattary, taǵy tórteýi basqa memleketterdiń azamattary», - delingen SІM habarlamasynda.

Málim etilgendeı, júrgizýshiler Qazaqstannyń Reseıdegi Elshiliginiń jedel jelisine habarlasyp, kómek suraǵan.

«Dıplomattardyń Reseıdiń quzyretti organdarymen júrgizgen kelissózderiniń nátıjesinde kólikterdi ótkizý máselesi sheshildi. Qazirgi ýaqytta júk kólikteri Qazaqstanǵa jolǵa shyqty», - dedi syrtqysaıasat vedomstvosynan.

QR Syrtqy ister mınıstrligi Qazaqstan azamattaryn Ýkraınadan elimizge oralýyn uıymdastyrý boıynsha jumysty jalǵastyrýda.