Elshi Z.Turysbekov Máskeý paradyna qatysýǵa kelgen qazaqstandyq ardagerlermen kezdesti
Elshiliktiń baspasóz qyzmetinen habarlaǵandaı, Z.Turysbekov ardagerlerdi Jeńis meıramymen quttyqtap, olarǵa erlikteri úshin alǵys bildirdi. Elshi sondaı-aq, kezinde Almaty men Aqtóbede jasaqtalǵan jáne Rjev-Vıazemsk operatsııasy barysyndaǵy shaıqastarǵa qatysqan 100 jáne 101-shi atqyshtar brıgadalarynyń qazaqstandyq jaýyngerlerine eskertkish ornatý týrly Prezıdent Nursultan Nazarbaevtyń tapsyrmasy boıynsha júrgizilip jatqan jumystar týraly áńgimelep berdi.
Dıpmıssııa basshysy qonaqtardy jaqynda Zelınograd qalasyndaǵy №229 mektepke Keńes Odaǵynyń Batyry Baýyrjan Momyshulynyń aty berilgeni jaıly habardar etti. Aǵymdaǵy jyly, B.Momyshulynyń 100 jyldyq mereıtoıy jyly - atalmysh mektepte Batyrdyń eskertkishin ornatý jáne murajaıyn ashý josparlanyp otyr.
Jeńis toıy qarsańynda Qazaqstan Elshiliginiń, Jambyl jáne Aqtóbe oblystary ákimdikteriniń qoldaýymen B.Momyshuly atyndaǵy mektep men Keńes Odaǵynyń Batyry Álııa Moldaǵulovanyń atyndaǵy №891 máskeýlik mektepti kompıýterlermen, ınteraktıvti taqtalarmen, oqý jáne ǵylymı-ádistemelik quraldarmen, qazaqstandyq avtorlardyń kitaptarymen, jıhazdarmen jaraqtandyrý jumystary júrgizildi. Al Pskov oblysyndaǵy Nevel qalasynda Keńes Odaǵynyń Batyry Mánshúk Mámetovanyń eskertkishi qaıta jańartyldy.
Máskeý saparynyń aıasynda ardagerler sondaı-aq, Taǵzym etý taýyndaǵy Jeńis memorıalynda boldy, Aleksandr baǵyndaǵy Belgisiz jaýyngerdiń zıratyna gúl shoqtaryn qoıdy.
Keshe, mamyrdyń 8-inde olar Tver oblysynyń Olenın aýdanyndaǵy Molodoı Týd selosynda qazaqstandyq jaýyngerlerdiń súıekterin qaıta jerleý rásimine qatysty. 1941-1943 jyldary bul aýdannyń aýmaǵynda qazaqstandyq 100 jáne 101-shi jekelegen atqyshtar brıgadalary qatysqan úlken shaıqastar bolǵan.
Al búgin, mamyrdyń 9-ynda ardagerler Volokolamsk qalasynda bolyp, general I.Panfılovtyń, B.Momyshulynyń eskertkishterine jáne Dýbosekovo razezindegi 28 panfılovshylardyń memorıalyna gúl shoqtaryn qoıady.