Elshi men vıtse-mınıstr Túrkııanyń SІM basshysyna Qazaqstan atynan kóńil aıtty

ASTANA. QazAqparat – Túrkııa Syrtqy ister mınıstri Mevlıýt Chavýshoǵlyna Qazaqstan basshylyǵy men qazaq halqy atynan elde oryn alǵan jer silkinisinen qaza tapqandarǵa kóńil aıtyldy, dep habarlaıdy QazAqparat tilshisi.

Qazaqstannyń Túrkııadaǵy Elshisi Erkebulan Sápıev pen Tótenshe jaǵdaılar birinshi vıtse-mınıstri Ibragım Qulshymbaev Túrkııanyń Syrtqy ister mınıstri Mevlıýt Chavýshoǵlyna jáne barsha túrik halqyna kóńil aıtty.

Taraptardyń áńgimelesýi barysynda tabıǵı apat oryn alǵan alǵashqy kúnnen bastap Qazaqstannyń Túrkııaǵa jan-jaqty kómek kórsetip jatqany aıtyldy.

Qazaqstandyq qutqarýshylar men dıplomattar táýlik boıy jumys istep jatyr.

Tabıǵı apat bolǵan aımaqqa gýmanıtarlyq kómek pen adamdarǵa qajetti ózge de zattar ýaqytyly jetkizilý ústinde.

Óz kezeginde túrik mınıstri Túrkııanyń barsha turǵyndary atynan baýyrlas qazaq halqyna qıyn-qystaý sátte kórsetken kómegi úshin rızashylyǵyn bildirdi.

«Eki el arasyndaǵy qarym-qatynas shynymen de baýyrlastyqqa qurylǵan. Oǵan dál osy qıyn sátte kózimiz jetip otyr», - dedi Mevlıýt Chavshoǵly.

Kezdesý Gazıantep qalasynyń áýejaıynda boldy. Dál osy áýejaıǵa Qazaqstannan gýmanıtarlyq júk tıelgen arnaýly bort kelip qonǵan edi.

Gýmanıtarlyq júk Memleket basshysynyń tapsyrmasymen búgin tańerteń Túrkııaǵa jóneltilgen bolatyn.

Gýmanıtarlyq kómektiń jalpy kólemi - 55 tonna.

Qazaqstannan jetkizilgen gýmanıtarlyq júk eń birinshi kezekte qajetti zattar bolǵandyqtan áýejaıdan birden Kahramanmarashqa jiberildi.

Bul óńirde adamdar baspanasyz qalyp, kómekke muqtaj bolyp otyr.

Júktiń ishinde joıqyn zilzaladan zardap shekkenderge kómek kórsetýge arnalǵan shatyrlar, jylytqyshtar, jyly kıimder jáne basqa da qajetti zattar bar.