Elshi Koreıa prezıdentiniń Ortalyq Azııaǵa sapary ne sebepti keıinge qaldyrylǵanyn túsindirdi

ASTANA. QazAqparat - Qazaqstandaǵy Koreıa Respýblıkasynyń Tótenshe jáne ókiletti elshisi Kım Desık Ońtústik Koreıa prezıdenti Mýn Chje Inniń Ortalyq Azııaǵa, sonyń ishinde Qazaqstanǵa sapary datasynyń aýystyrylýyn túsindirdi, dep habarlaıdy QazAqparat.

«Aldaǵy sammıtterdiń (eki Koreıa men KHDR-AQSh arasyndaǵy) tarıhı mańyzdylyǵyn eskere otyryp, Koreıa Respýblıkasynyń prezıdenti eldi tastap kete almaıdy. Sondyqtan, 2018 jyldyń birinshi jartyjyldyǵyna josparlanǵan sapar keıingi qaldyryldy. Bul aqparatty dıplomatııalyq kanaldar arqyly memleket basshylyǵyna habarlaǵanymyzda, Nursultan Nazarbaev jaǵdaıdy óte jaqsy túsindi. Ol Koreıa túbegindegi kelissózderdiń beıbitishilik pen tynyshtyq ákelýi úshin tabys tiledi. Túsinispeýshilik bolǵan joq», - dedi elshi Astanadaǵy baspasóz máslıhatynda.

Sondaı-aq, ol qazirgi tańda sapardyń qaı ýaqytqa josparlanǵany belgisiz ekendigin málim etti.

Ol Mýn Chje In men KHDR kóshbasshysy Kım Chen Ynnyń 27 sáýirde eki Koreıanyń shekarasyndaǵy Phanmýnchjom jerinde kezdesetinin eske saldy. Keıinirek Kım Chen Yn men AQSh prezıdenti Donald Tramp kezdesedi.

«Tarıhta AQSh pen KHDR memleket basshylary eshqashan kezdespegen. Eger taraptar kelisimge qol jetkizse, bul «ǵasyr mámilesi» bolady. Qazirgi tańda sammıttiń qaıda ótetini talqylanyp jatyr», - dep túsindirdi dıplomat.

Sonymen qatar, elshi Kım Desık Qazaqstannyń tek Koreıa túbegin ǵana emes, jalpy álemdi ıadrolyq qarýsyzdandyrýǵa qosqan úlesin atap ótti.

«Qazaqstan biz úshin Ortalyq Azııadaǵy mańyzdy el bolyp tabylady. (...) Qazaqstan halyqaralyq alańdarda Koreıa Respýblıkasyn qoldap, KHDR-ge ıadrolyq qarýsyz-aq ómir súrýge bolatynyn únemi bildirip júr. Prezıdent Nursultan Nazarbaev 1993 jyly Qazaqstandaǵy Semeı ıadrolyq polıgonyn japty. Osy arqyly álemdik qaýipsizdikke úlken úles qosty. Sondaı-aq, ol únemi ıadrosyz álem qurýǵa baılanysty birqatar bastamalardy kóterýde», - dedi dılomat.

Onyń aıtýynsha, Nursultan Nazarbaev Koreıaǵa alty ret saparlaǵan. Jalpy, eki eldiń basshylary arasynda joǵary deńgeıde 13 kezdesý bolǵan.

Kım Desık Qazaqstannyń barlyq kezdesýler men sammıtterde Koreıa túbegin ıadrolyq qarýsyzdandyrý máseleleri boıynsha Koreıa Respýblıkasynyń ustanymyn qoldap kele jatqany úshin alǵys bildirdi.