Elshi-dıplomat Ádil Ahmetovtiń jańa kitaby jaryq kórdi
"Ǵasyr ǵıbraty" dep atalatyn bul jınaqta jahandanǵan álemniń geosaıası kelbeti men ondaǵy Qazaqstannyń dara joly týraly saraptamalyq maqalalar toptastyrylǵan.
"Jınaqqa engen maqalalardyń 99 paıyzy ár jyldary "Egemen Qazaqstan" gazetinde jaryq kórgen. Olardy jahandyq geosaıasattyń búgingi-bolmys bitimi, ondaǵy Qazaqstannyń dara joly jáne musylman álemi dep úshke bóldim. Kitapta qazirgi qubylmaly geosaıasat, kósh basynda turǵan Amerıkanyń jaǵdaıy, Qytaı men Eýropa, Sıngapýrdyń jaǵdaıy týraly paıymdamalar bar. Saıasat suńǵylalary - Zbıgnev Bjezınskıı, Genrı Kıssındjer, Djozef Stıglıts, Djeremı Rıfkın ǵulamalardyń kitaptaryn súzip shyǵyp, sonyń sıntezin óz elimizge paıdasy tıer-aý degen maqsatpen toptastyrdym", - dedi Ádil Ahmetov jańa kitaptyń tanystyrylymynda.
Avtordyń aıtýynsha, jańa jınaq jas dıplomattar men saıasatkerler úshin paıdaly bolmaq.
Qalyń oqyrmanǵa qoljetimdi etý úshin "Ǵasyr ǵıbratynyń" elektrondy nusqasy Egemen Qazaqstan gazetiniń saıtynda jarııalanǵan.
Ádil Qurmanjanuly Ahmetov 1941 jyly Almaty oblysy Narynqol selosynda dúnıege kelgen. 1963 jyly Almaty shet tilderi ınstıtýtyn aǵylshyn jáne qazaq tili mamandyǵy boıynsha bitirgen. Keıinirek, osy ınstıtýtta oqytýshy, aǵa oqytýshy, dekan, prorektor, rektor qyzmetterin atqarǵan.
Odan bólek, Ádil Ahmetov QR Syrtqy ister mınıstriniń birinshi orynbasary (1999-2000), QR Ulybrıtanııadaǵy Tótenshe jáne Ókiletti Elshisi (2000-2001) bolǵan. 2001 jyly Qazaq-Brıtan tehnıkalyq ýnıversıtetin qurdy. 2007-2013 jyldary QR Parlamenti Senatynyń depýtaty, Senattyń Halyqaralyq qatynastar, qorǵanys jáne qaýipsizdik máseleleri jónindegi turaqty komıtet hatshysy jáne EQYU sol kezdegi tóraǵasynyń Musylmandardy kemsitý jáne shettetýmen kúres jónindegi jeke ýákili boldy.