Elordanyń jylý merzimine daıyndyq jumystary pysyqtaldy
«Astana-Teplotranzıt» AQ 2015-2019 jyldarǵa arnalǵan «Nurly jol» ınfraqurylymdy damytýdyń memlekettik baǵdarlamasyn iske asyrýǵa qatysady.Sonyń negizinde kompanııaǵa elimizdiń Ulttyq qorynan jylýmen jabdyqtaý nysandaryn salý úshin jylyna 0,02% jeńildiktegi mólsherlememen nesıelik qarajat bólinedi.
«Bizdiń kásiporyn jylý energııasynyń kózinen tutynýshyǵa deıin tasymaldaýdy qamtamasyz etedi. Sondaı-aq, jylý magıstralin, sorǵy stantsııalaryn jáne elektr quraldaryn jylytý maýsymyna daıyndaıdy. Ótken jyly atqarylǵan jumystarǵa kelsek, apattyq jaǵdaılardyń aldyn alý, jylý ysyraptarynyń paıyzdyq kórsetkishin tómendetý jáne tabıǵı tozýdy azaıtý baǵyttary boıynsha júrgizildi», - dedi «Astana-Teplotranzıt» AQ basqarma tóraǵasy Vasılıı Krýsko.
Joǵaryda atalǵan jumystarǵa ótken jyl boıynsha 1 mlrd-tan asa qarajat bólinip, ol - qalanyń jylýmen jabdyqtaý senimdiligin qamtamasyz etý, negizgi quraldardy qaıta jańartý, tehnıkalyq qaıta jaraqtandyrý jáne jylý energııasyn tasymaldaý kezinde onyń ysyraptaryn tómendetý baǵyttaryna jumsaldy.
«Biz aldymen kútimi bitken, jańalaý qajet jylý qubyrlaryna jóndeý jumystaryn júrgizdik. Bir magıstraldi qubyrmen jańalaǵanda birneshe nysandardy qamtıdy. Mysaly, osy biz turǵan jerde turǵyn úılerden bólek balabaqsha, saýda oryndary men keńseler ornalasqan. Bul degenimiz jylý qubyrlaryn qaıta jóndeý, jańalaý jumystarynyń júıeli túrde júrgizilýi», - dedi basqarma tóraǵasy.
Ústimizdegi jyly qala boıynsha jylý jelileriniń 85% qaıta jóndeýden ótti.
Kompanııa basshysynyń aıtýynsha, 2018 jyly «Nurly jol» baǵdarlamasy boıynsha qurylys nysandaryna 2 mlrd. teńge zaemdyq qarajat bólindi. Oǵan jańadan 2 sorǵy stantsııasy men uzyndyǵy 6 704 sharshy shyqyrymdy quraıtyn jylý qubyryn salý josparlanýda.