Elordanyń úzdik memlekettik qyzmetkerleri anyqtalady

ASTANA. QazAqparat - Astanada respýblıkalyq «Eń úzdik memlekettik qyzmetker» baıqaýynyń aımaqtyq kezeńi aıaqtaldy, dep habarlaıdy elorda ákimdiginiń resmı saıty.

Aımaqtyq jáne respýblıkalyq kezeńderden turatyn «Eń úzdik memlekettik qyzmetker» baıqaýy memlekettik qyzmetkerlerdi qosymsha yntalandyrý maqsatynda jyl saıyn «Memlekettik qyzmetker» kúni qarsańynda uıymdastyrylady. Bıylǵy baıqaý QR memlekettik qyzmet organdarynyń 20 jyldyǵyna oraılastyryp otyr.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha Departamenti jetekshisiniń orynbasary Roman Kım baıqaý qatysýshylaryn irikteý talaptarynyń qatańdaı túskendigin alǵa tartty.

«Astana qalasy boıynsha baıqaýǵa qatysýǵa 45 memlekettik qyzmetker nıet bildirdi. Olardyń tek 14-i ǵana alǵashqy kezeńge ótip, strategııalyq baǵdarlamalyq qujattar boıynsha test tapsyrsa, búgingi ekinshi kezeńge 9 joldama aldy. Baıqaýǵa qatysýshylar ózderiniń kásibı jáne basqarýshylyq qasıetteriniń joǵary deńgeıin, memlekettik qyzmetke degen adaldyǵyn, komandada jumys isteý qabileti men bastamashyldyǵyn kórsetýi tıis», - dedi Roman Kım.

«Eń úzdik memlekettik qyzmetker» baıqaýynda Astana qalasynyń namysyn qorǵaıtyn úmitkerlerdiń esimderi 16 mamyrda belgili bolady.

Aqyrǵy saıysta qatysýshylar respýblıkalyq konkýrs komıssııasynyń nazaryna ózderiniń jobalyq jumystaryn usynady.

Aıta keteıik, «Eń úzdik memlekettik qyzmetker» baıqaýyna ákimshilik jáne tártiptik jaýapkershilikke tartylmaǵan, sondaı-aq, memlekettik qyzmet salasynda kem degende 1 jyl jumys istegen azamattar qatysa alady.