Elordanyń uzaqqa sozylǵan qurylys nysandarynda qandaı jumys júrgizilýde

NUR-SULTAN. QazAqparat - Qala ákimi Altaı Kólginov problemalyq turǵyn úı keshenderiniń úleskerlerimen kezdesti, dep habarlaıdy QazAqparat ákimdiktiń saıtyna silteme jasap.

Máselen, «Jaǵalaý-3» turǵyn úı kesheninde barlyq tereze ornatyldy jáne ishki ınjenerlik jeliler júrgizildi. Ǵımarattyń qasbetin nyǵaıtý, kireberisterde plıtkalar ornatý jalǵasýda.

A. Kólginov atap ótkendeı, qurylys qarqyny álsiz, TK aýmaǵyndaǵy jumysshylar sanyn arttyrý qajet.

«Terrıtorııa Komforta-2» turǵyn úı kesheni 2004 jyly salyna bastaǵan. Qala ákimine turǵyndar asfalt tóseýdi surady. Úıge tehnıkalyq tekserý júrgizildi jáne jol bóligi asfalttaldy. Ǵımarattyń qasbetin nyǵaıtý jáne parkıngtiń qurylymyn nyǵaıtý kerek.

Qalada barlyǵy 51 (76 úı) problemalyq turǵyn úı kesheni bar. Jyl sońyna deıin 10 turǵyn úı kesheni paıdalanýǵa beriledi.

Qurylys barysyn Nur Otan jáne máslıhat depýtattary baqylaıdy.