Elordanyń úsh aýdanynyń ákimderi ardagerlerge páterler kiltterin tapsyrdy
Atap aıtqanda, Esil aýdanynyń ákimi Q.Jańabergenov ardager Zoıa Laşenovanyń úıinde boldy. Maıdanger qart soǵysqa 1943 jyly baılanysshy retinde aralasyp, Ýkraına, Belarýs, Baltyq, Polsha jerlerinde ótken urystarǵa qatysty. «Tarıhty jasaýshylar sonymen qatar onyń jetkizýshisi de bolýy kerek. Sondyqtan sol bir zamandaǵy erlikterdi, jeńistiń qandaı qıynshylyqtarmen jetkendigin odan ári áńgimeleý úshin uzaq ómir súrińizder», - dedi aýdan ákimi.
Al Serik Ahmetov maıdanger Aleksandr Pavlýhınniń shańyraǵynda bolyp, oǵan uzaq ómir, zor densaýlyq tiledi. Aýdan basshysy ardegerge páter kiltin tapsyra otyryp, Uly Jeńistiń 70 jyldyǵyn birge qarsy alaıyq degen tilegin bildirdi. «Bul óte aýyr jeńis boldy. Men Baltyq elderinde, Ýkraınada ótken urystarǵa qatystym. Soǵystyń sońǵy mezetterinde keskilesken urystar ótti. Biz balalarymyzdyń, nemerelerimizdiń 66 jyl ótse de bizderdi umytpaǵandyqtaryna alǵysymyz sheksiz», - dedi A.Ivanovıch.
Soǵys ardageri Sabyr Baıjumanovtyń úıine atbasyn burǵan Sábıla Mustafına da qart maıdangerge uzaq ómir tilep, jańa páter kiltin tabys etti.
Atalǵan úsh maıdanger de elordanyń sol jaǵalaýynda ornalasqan «Jaǵalaý 3» turǵyn úı kesheninen páterge ıe boldy.
Astanadaǵy barlyq Uly Otan soǵysynyń ardagerleri 2008 jyly-aq tolyǵymen pátermen qamtamasyz etilgen bolatyn. Degenmen jyl saıyn elordada elimizdiń basqa óńirlerinen kelgen ardagerler tirkelýde. Qalalyq ákimdik elordada tirkelgen barlyq maıdangerlerdi 9 mamyrǵa deıin baspanamen qamtamasyz etýdi alǵa qoıdy. Qazirgi tańda qalada shamamen 400-ge jýyq maıdanger turady.