Elordanyń temirjol vokzaldary jolaýshylar tasymalyna daıyn ba

NUR-SULTAN. QazAqparat - QR Indýstrııa jáne ınfraqurylymdyq damý mınıstrliginiń Kólik komıteti jolaýshylar vagondary jəne Nur-Sultan qalasyndaǵy temirjol vokzaldarynyń pandemııa jaǵdaıynda jumys isteýge daıyndyǵyn tekserdi, dep habarlaıdy QazAqparat tilshisi.

«QR IIDM Kólik komıteti tóraǵasynyń orynbasary J.Taıjanov «QTJ» UK» AQ ókilderimen jáne tasymaldaýshylarmen birge jolaýshylar vagondarynyń jəne Nur-Sultan qalasyndaǵy temirjol vokzaldarynyń pandemııa jaǵdaıynda tasymaldaýdy júzege asyrýǵa daıyndyǵyn tekserdi. Jalpy, kóliktegi bas sanıtarlyq dərigerdiń nusqaýlary boıynsha jolaýshylar vagondarynda jəne Nur-Sultan qalasyndaǵy vokzaldarda qajetti is-sharalar jasalǵan», - delingen Indýstrııa jáne ınfraqurylymdyq damý mınıstrligi taratqan aqparatta.

Vedomstvo málimetinshe, «Nurly Jol» jáne «Nur-Sultan-1» vokzaldarynda jolaýshylardyń aǵynyn retteý úshin shekteý lentalary tartylǵan. Ara qashyqtyqty saqtaý belgileri ornatyldy. Kútý zaldarynda sanıtaızerler ornalastyrylǵan. Ərbir jolaýshylar vagondary gıgıenalyq suıyqtyq jəne qorǵanys qurylǵylarymen qamtylǵan.

«Jalpy, atqarylǵan is-sharalar pandemııa kezinde jolaýshylar tasymalyn maksımaldy túrde qaýipsiz tasymaldaýǵa múmkindik beredi», - dedi mınıstrlikten.

Eske salaıyq, buǵan deıin el ishindegi temirjol qatynasy 1 maýsym kúni qaıta jandanatynyn habarlaǵan bolatynbyz. Poıyz tasymaly úsh kezeńmen qalpyna keltiriledi.

QazAqparat agenttigi vokzaldar men poıyzdardyń qaýipsizdik sharalaryna sholý usynyp, jolaýshylar eskerýi tıis máselelerdi atap ótken bolatyn.