Elordanyń sol jaǵalaýynda Oqýshylar saraıynyń qurylysy bastaldy

NUR-SULTAN. QazAqparat – Astana ákimi Altaı Kólginov Instagram-daǵy paraqshasynda Oqýshylar saraıynyń qurylysy, oqýshy oryndarynyń tapshylyǵyn azaıtý jáne bos ýaqytty paıdaly ótkizetin oryndar jaıly jazdy, dep habarlaıdy QazAqparat.

«Osyǵan deıin «Nomad», «Sarmat», «Infınıtı» jáne t.b. turǵyn úı keshenderiniń turǵyndary qalanyń sol jaǵalaýynda Oqýshylar saraıyn, jańa mektep jáne gúlzar salý máseleleri boıynsha júgindi. Bul problemalardyń bári sheshildi.

Mysaly, Turan dańǵyly boıynda jeke ınvestıtsııalar esebinen oqýshylar saraıynyń qurylysy bastaldy. Qazirgi ýaqytta alańdy bólshekteý (demontaj) jáne tegisteý jumystary júrip jatyr. Oqýshylar saraıynyń jalpy aýdany shamamen 5 myń sharshy metrdi quraıdy. Keshende basseın, robototehnıka jáne IT-baǵdarlamalaý kabınetterin, horeografııa, sporttyq-bal bıi, gımnastıka, shahmat jáne t.b. zaldaryn ashý josparlanyp otyr. Bul Oqýshylar saraıy qala turǵyndarynyń ótinishi boıynsha sol jaǵalaýda ashylmaq. Sebebi alǵashqy salynǵan Oqýshylar saraıy qalanyń oń jaǵalaýynda ornalasqan.

Birneshe úıdiń turǵyndary kótergen ekinshi másele – mektep qurylysy. Qabanbaı batyr dańǵyly men Syǵanaq kóshesiniń qıylysynda «Pokolenıe» turǵyn úı kesheniniń aýdanynda 2400 oryndyq mektep salamyz (2 aýysymdy). Onyń qazanshuńqyryn qazý jáne qadalaryn qaǵý jumystary bastaldy.

Sonymen qatar, oqýshy oryndarynyń tapshylyǵyn azaıtý maqsatynda № 59 mektep aýmaǵynda (Saýran kóshesi, 5/1) 1200 oryndyq taǵy bir korpýs salamyz (2 aýysymda). Naýryz aıynyń sońyna deıin memlekettik saraptamadan jobalyq-smetalyq qujattamanyń shyǵýyn kútemiz, sáýirde mektep qurylysyna konkýrs jarııalaımyz. Bıyl oqý ornynyń qurylysyna qarajat qarastyryldy.

Úshinshi másele – ashyq aspan astynda bos ýaqytty paıdaly ótkizetin oryn qurý. Abattandyrý maýsymy bastalysymen Qabanbaı batyr dańǵylynyń boıynda («Infınıtı» TK qarama-qarsy) aýmaqty kógaldandyrý men abattandyrýǵa basa mán berilip, qoǵamdyq keńistik salamyz», - dep jazdy elorda ákimi.