Elordanyń Saryarqa men Baıqońyr aýdandaryna qalalyq bıýdjetten nege az qarjy bólinedi

ASTANA. QazAqparat – Elordanyń 4 aýdany arasynda qalalyq bıýdjet qarajaty teń bólinbeıdi. Mundaı máseleni Astana qalalyq qoǵamdyq keńesi tóraǵasynyń orynbasary Zeınolla Shibkenov kóterdi, dep habarlaıdy QazAqparat tilshisi.

«Tórt aýdan boıynsha aqsha durys bólinbeıtindigi týraly máseleni birneshe márte kóterdik. Aýdandar arasyndaǵy soma aıyrmashylyǵyn ózderińiz de qarańyzdar. Máselen, Esil aýdanyna 15 mlrd teńge bólinse, Saryarqa aýdanyna 9 mlrd, Baıqońyr aýdanyna 8 mlrd teńge qarastyrylǵan. Muny qalaı túsindirýge bolady? Keıbir aýmaq, aıtalyq Baıqońyr ózge aýdandarǵa qaraǵanda úlken ǵoı. Adam sany boıynsha barlyq aýdandy birdeı deýge bolady», - dedi ol qalanyń 2023-2025 jyldarǵa arnalǵan bıýdjet jobasyn qoǵamdyq talqylaý barysynda.

Dál osy saýalǵa jaýap bergen ákimdik ókili Esil aýdanyn aldaǵy ýaqytta ekige bólý josparyna baılanysty qarajattyń kóbirek bólingendigin alǵa tartady. Eger Esil ekige bólinse, onda aýdandar arasyndaǵy qarajatta teńdik ornaıtyn bolady. Sonymen qatar Esil aýdanynda qosymsha qarajatty qajet etin Botanıkalyq saıabaq syndy nysandarda da ornalasqan.

Aıta keteıik, qalanyń kelesi jylǵa arnalǵan bıýdjetinde Almaty aýdany apparatyna – 10 mlrd 914,9 mln teńge, Baıqońyr aýdanyna - 8 mlrd 288,5 mln teńge, Esil aýdanyna – 15 mlrd 272,1 mln teńge, Saryarqa aýdanyna –9 mlrd 887,1 mln teńge qarastyrylǵan.