Elordanyń salynýymen birge sana jańǵyrdy - Dáýren Abaev

ASTANA. QazAqparat - Bıyl bizdiń el - Astana kúnin atap ótti. Arqanyń tósindegi elordanyń 20 jyldyǵy erekshe sán-saltanatymen este qaldy. Kóktemdegi qyzǵaldaqtaı jaıqalǵan bas shahar qandaı qurmetke de laıyq. Mundaı pikirdi QR Aqparat jáne kommýnıkatsııalar mınıstri Dáýren Abaev «Egemen Qazaqstan» gazetinde jarııalanǵan maqalada bildirdi.    

Jıyrma jyldyń ishinde adam tanymastaı qulpyrǵan qalanyń san-túrli teńeýleri de ǵajap. Bas qalaǵa aıtylǵan teńeýlerdiń arasyndaǵy kóńilge qonymdysy - «Astana - Eýrazııanyń injý-mar­­jany». Shynynda da, Uly Dalanyń bas shahary tabıǵı mar­­jandaıyn jyldan-jylǵa túr­lenip, nyǵaıyp kele jatyr. 

Prezıdenttiń Astanany Arqa dalasyna kóshirýi ýaqyt talabyna saı jasalǵan naqty qadam, oń sheshim. Qazir erke Esildiń jaǵasyndaǵy elorda ózine júktel­gen mindetti asqaq abyroımen atqaryp otyr. Jıyrma jyl buryn bul bastamaǵa senimsizdik tanytyp, kúmán keltirgender de boldy. Óıtkeni áleýmettik-ekonomıkalyq daǵdarysty basynan ótkergen eldiń astanasyn aýystyrý ońaı sharýa emes edi. As­tana qarapaıym ákimshilik orta­lyqtan asa almaıdy dep bolja­ǵandar da bar.

Alaıda Astanany aýysty­rý bar­lyq senimsizdiktiń seńin buz­dy. Bul aldyn ala eseptel­gen, jan-jaqty tek­seril­gen stra­tegııalyq qadamnyń oń nátı­jesi bolatyn. Memleket bas­shysy qoǵamnyń qajettiligin eskere otyryp, barlyq kedergi­lerdiń sheshimin taba bildi.   

Búgingi kúni Astananyń salynýy el ekonomıkasynyń jan­danýyna sep bolǵanyn moıyndamaıtyn adam joq. Arqaǵa qo­nys aýdarý kóptegen shyǵynǵa ba­týmen teń degen tujyrym aıtqan­dardyń da az bolmaǵany anyq. Qazir sandar sóıleıtin zaman. Má­selen, elordany damytýǵa jum­salǵan ınvestıtsııa ózin eki jarym esege aqtady. Astana res­pýblıka bıýdjetiniń donoryna, iskerler alańyna aınaldy. Qazir qalanyń óńirlik jalpy óniminiń qurylymyndaǵy shaǵyn jáne orta bıznestiń úlesi 57%-ti qurady. Bul elimizdiń ózge óńir­lerinen kósh ilgeri kórsetkish.
 

Eń bastysy, jańa Astana aý­qym­dy qurylys keshenderinen bas­tap, azyq-túlik beldeýine deıin­gi barlyq aımaqtyń jáne kóp­tegen salanyń ilgerileýine túrtki boldy.  

Elordanyń ekonomıkalyq órleýi kezdeısoqtyq emes. Bul - El­basynyń bilikti strateg retin­degi baǵyttarynyń jemisi. Óıt­keni Prezıdent úshin pragma­tızm, qoǵamnyń ál-aýqaty, aza­mat­tardyń turmys deńgeıin arttyrý - sheshim qabyldaýda árdaıym ba­symdyqqa ıe bolyp qala beretin negizgi krıterıılerdiń biri.  

Alaıda Astanany kóshirýde ekonomıkalyq qana emes ózge de qundylyqtar eskerilgeni belgili. Bul bastamaǵa tereń úńilgen adamnyń óz-ózine degen senimi artady. Óıtkeni jańa qala barlyq salany qamtıtyn, ómirdi túrli qyrynan tanýǵa múmkindik beretin aýqymdy joba ispetti.   

Qazaq handyǵy qurylǵan ýaqyttan bergi tarıhymyzda halqymyz júzege asyrǵan eń aıshyqty ári ǵalamat qurylystyń biri de osy Astana bolyp otyr.  Árıne, Keńes kezeńinde úlken shaharlar salynyp, qýatty ındýstrııalyq nysandar boı kóterdi. Biraq bul qurylystarǵa búkil Keńes odaǵynyń mamandary atsalysqan edi.     

Dál osyndaı irgeli bastamalardy ózdigimizden júzege asyrýǵa kelgende júreksiný, mańyzdy sheshim qabyldar sátte «ortalyqqa» eleńdeý sııaqty sezimderdi de eńserdik.  

Osyndaı ótpeli kezeńniń kúr­deli sátinde qolymyzdan is keletin el ekenimizdi dáleldep shyǵý aýa­daı qajet boldy. Táýelsiz Qazaqstannyń óz taǵdyryna ózi jaýap bere alatyn memleket retin­de aıaqqa turyp ketýi de osy­ǵan baılanysty bolatyn.

Astananyń salynýy ulttyq-memlekettik qurylystyń mańyz­dy baǵytynyń birine aınaldy. Prezıdentimiz osyndaı senimdi qadamy arqyly búkil eldi alǵa bastady. 

Astana arqyly kúlli álemge jáne ózimizge bir judyryqtaı jumylsaq bıik beleske jete alatynymyzdy dáleldedik. Іri landshaftardy, tarıhty ózgerte alatynymyzdy kórsettik.    

Arqa dalasynda sáýletimen kóz súısintip ósip kele jat­qan megapolıs bizdiń tarıhı jady­myzdaǵy barlyq kedergilerdi joıyp, qasań stereotıpterdiń seńin buz­dy. Osylaısha halqymyzdyń ózine degen senimi nyǵaıdy, arman­dary ulǵaıdy, kemel keleshekke bastaıtyn dańǵylǵa bet burdy. Qa­zir elimizdiń ár túkpirindegi aǵaıyn Astanaǵa qonys aýdaryp ja­tyr. Óıtkeni keleshektiń altyn kópiri dál osy qalada degen senim jerlesterimizdiń júregin jaýlady. 

Elordanyń salynýymen birge sana jańǵyrdy. Astana rýhanı táýelsizdiktiń de bastaýy boldy.  

Jańa elorda ózine oń áser etkenin, onyń damýyna óziniń de qatysy baryn árkim de - qala qu­ry­lysyna tikeleı atsalysqandar  da, basqalar da ómirindegi oń ózge­rister arqyly sezindi.  Sondyqtan da bas shahardyń týǵan kúni qazaq­standyq ár otbasy úshin qýatty erik-jigerdiń, ulttyq maqtanysh pen bolashaqqa degen senimniń merekesine aınaldy.  

* * *

Eldiń boıtumaryna aınalǵan, kúnnen-kúnge jarqyrap, jaınap kele jatqan Astananyń ortasynda júrgen bizder úshin, qalanyń jańa qazaqstandyq memlekettilikti da­my­týǵa qosqan úlesin tolyq uǵy­ný qıyndaý. Alaıda, elimizdiń ja­ńa tarıhynyń eń mańyzdy kezeńin tutas qamtıtyn shejiresin keleshek urpaq jazatynyna jáne onyń birinshi taraýy ádiletti túrde «Tuńǵysh» dep atalatynyna se­nimdimin.