Elordanyń psıholog mamandary áriptesterin qaýymdastyqqa birigýge shaqyrady
Bundaı usynys búgin elorda ákimdiginde «Úılesimdi otbasylyq qarym-qatynastardy qalyptastyrýdaǵy Astana qalasynyń psıhologııalyq qyzmetiniń roli» degen taqyrypta «dóńgelek ústel» otyrysy barysynda mamandar tarapynan tústi.
Máselen, «Keleshek» psıhologııalyq ortalyǵynyń dırektory Natalıa Semenenko elimizde psıhologııalyq qyzmetterdiń jumystaryn úılestiretin keńestiń joq ekendigin alǵa tartady. «Sondyqtan olar jeke-jeke otaý quryp, bastary birikpeı otyr. Jalpy psıhologııalyq qyzmetter bilim, densaýlyq, salalarynda, memlekettik organdarda, túrli maqsatty toptarmen jumys isteıtin ÚEU-darda, sondaı-aq otbasyna psıhologııalyq turǵydan kómek beretin kommertsııalyq qurylymdar da bar. Alaıda olar qalaı psıhologııalyq kómek beredi, atalǵan ortalyqtardyń mamandarynyń deńgeıleri qandaı, qaı baǵytta jumys isteıdi degen máseleler tys qalýda», deıdi ol. Sondyqtan búgingi dóńgelek ústel otyrysy barysynda túrli qurylymdardaǵy psıhologııalyq qyzmetter bas qosyp, otbasyna jan-jaqty psıhologııalyq kómek berý barysynda kim nemen jumys isteıdi, qandaı múmkindikter bar, psıhologııalyq qyzmettiń áleýetti qandaı degen máselerdi anyqtaýdy maqsat tutyp otyr.
N.Semenenko bilim berý salasyndaǵy mektep psıhologtarynyń bilim oshaqtaryndaǵy qordalanǵan problemalardy sheshýge múmkindikteri jete bermeıdi dep sanaıdy. Sondyqtan olardy mektep ujymynan shyǵaryp, bilim berý departamentteriniń qaramaǵyna qosqan durys degen oıyn alǵa tartady.
Іs-sharaǵa tek qana psıhologtar ǵana emes sonymen qatar Astana qalasy ákimdigi janyndaǵy Áıelder isteri jáne otbasylyq-demografııalyq saıasat komıssııasynyń músheleri, túrli memlektettk organdardyń ókilderi qatysty.