Elordanyń Polıtsııa departamentinde Tuńǵysh Prezıdent kúnine arnalǵan saltanatty shara ótti
«Elimizdiń áleýmettik-ekonomıkalyq damýy, álemdik arenadaǵy memleketimizdiń joǵary mártebege ıe bolýy Elbasy Nursultan Nazarbaevtyń esimimen tyǵyz baılanysty»,- dedi ardagerler men jeke quram aldynda quttyqtaý sóz sóılegen PD bastyǵynyń birinshi orynbasary Baqytjan Malybaev. Elordalyq polıtsııa qyzmetkerleri qoǵamdyq tártipti qamtamasyz etýde jáne qylmyspen kúreste qol jetkizgen joǵary kórsetkishteri úshin medaldarmen, tós belgilermen, gramotalar jáne alǵys hattarmen marapattaldy. Arnaıy jáne jumyldyrý daıarlyǵy basqarmasy bastyǵy Arman Jaldyǵulovqa kezekten tys «polkovnık» sheni tabys etildi. «Quqyq tártibin qamtamasyz etýge qosqan úlesi úshin» medalimen Patrýldik polıtsııa polkiniń qyzmet ınspektory polıtsııa aǵa leıtenanty Marchenko Maksım, ІІ sanattaǵy «Іshki ister organdarynyń úzdigi» tósbelgisimen Arnaıy batalon qyzmetiniń aǵa ınspektory polıtsııa kapıtany Baǵlan Moldabaev marapattaldy. Sondaı-aq Nur-Sultan qalasy PD Ardagerler Keńesiniń tóraǵasy Qarshyǵa Kishkentaev jınalǵandardy ataýly kúnmen quttyqtady.
Іs-shara sońynda Táýelsiz Qazaqstannyń qalyptasýy men damýy jolynda Elbasy - Nursultan Ábishuly Nazarbaevtyń róli týraly «Bastama jáne áriptestik» atty derekti fılmi jeke quram nazarlaryna usynyldy.