Elordanyń óner adamdary qaıyrymdylyq jasaýda

NUR-SULTAN. QazAqparat - Elordanyń eriktileri men óner adamdary qalada karantın jarııalanýyna baılanysty tegin maska pen azyq-túlik taratyp jatyr, dep habarlaıdy QazAqparat tilshisi.

«Dúnıjúzilik densaýlyq saqtaý uıymynyń koronavırýsty indet dep jarııalaýyna oraı Nur-Sultan, Almaty qalalary karantınge jabyldy. Osyǵan qaraı Nur-Sultan qalasy ákimdiginiń uımdastyrýymen volonterlerden jáne belgili óner adamdarynan qurylǵan top qalamyzda turatyn qart adamdar, kópbalaly analar men jalǵyz basty adamdarǵa kómek kórsetý maqsatynda tegin maska, azyq-túlik taratýda», - delingen QR Mádenıet jáne sport mınıstrliginiń baspasóz qyzmeti taratqan aqparatta.

Vedomstvo málimetinshe, elordanyń mádenıet basqarmasyna qarasty óner adamdarynyń ishinen bul sharaǵa «Jastar teatry» dırektory, ánshi Ernar Jumataev, belgili kıno jáne teatr akteri Ádil Ahmetov, Memlekettik akademııalyq fılarmonııa dırektorynyń orynbasary, akter Oljas Sydyqbek qatysýda.