Elordanyń kópbalaly analary qolóner boıynsha tegin oqýdan ótedi

NUR-SULTAN. QazAqparat - Nur-Sultanda qala ákimdiginiń qoldaýymen «Asyl ana» áleýmettik jobasy iske qosyldy. Joba aıasynda 6, 7, 8, 9 maýsym kúnderi kópbalaly analarǵa tiginshilikke, qoldanbaly ónerge úıretetin tegin sheberlik sabaqtary ótkiziledi, dep habarlaıdy qala ákimdiginiń resmı saıty.

Sheberlik sabaqtaryn elimizge tanymal, etnıkalyq stılde qolóner jáne ulttyq óner buıymdaryn shyǵaratyn dızaıner, QR Prezıdentiniń «Altyn Sapa» syılyǵynyń laýreaty, «Qurmet» syılyǵynyń ıegeri Yrza Tursynzada ótkizedi. Sheberlik sabaqtary «Dıplomat» qonaq úıinde saǵat 11:00-den bastalady.

Sheberlik sabaǵynyń qatysýshylaryna qoldanbaly ónerdiń qyr-syry, jeke kásipti ashýdyń joldary jáne ony áleýmettik jelilerdi paıdalana otyryp, tabysty júrgizýdi úıretetin bolady.

«Atalmysh is-sharaǵa qolónerdi úırengisi kelgen kópbalaly analardyń bári qatysa alady. Óz kezeginde qatysýshylar tarapynan talpynys, óz betinshe tabys tabýǵa umtylý jáne tabysty áıelder qatarynda bolýǵa degen ynta-jiger talap etiledi», - dep habarlaıdy uıymdastyrýshylar.

Trenıng barysynda paıdaly bilim alǵan kópbalaly analar elorda kúni merekesine arnalǵan «Asyl ana» baıqaýyna qatysa alady. Ol 15 maýsymda ótedi.

Baıqaýǵa qatysýshylar kórmede óz buıymdaryn jurtshylyqqa usynady, al jeńimpazdar dıplomdar men tigin mashınalary sekildi baǵaly syılyqtarǵa ıe bolady.

Uıymdastyrylǵan sheberlik sabaqtary «Asyl ana» áleýmettik jobasynyń bir bóligi bolyp esepteledi. Onyń maqsaty - kópbalaly analardy qolónershilikke úıretý, olardy ulttyq brendti damytý arqyly shaǵyn jáne orta bızneske tartý. Іs-sharalar keshenine oqytý semınarlary, tigin jáne qoldanbaly ónerdi oqytý boıynsha semınarlar, áleýmettik jeliler arqyly bıznes júrgizý úshin ózderiniń kórmelerin, sheberlik synyptaryn uıymdastyrý kiredi. Jobanyń árbir kezeńi sheberlerdiń, psıhologtardyń, zańgerlerdiń jáne bıznes jattyqtyrýshylardyń jetekshiligimen júrgiziledi.

Sonymen qatar, «Asyl ana» jobasy zańgerlik jáne psıhologııalyq keńester, ońaltý kómegin kórsetetin kópbalaly analardy qoldaý ortalyǵyn qurýdy kózdeıdi. Bul jerde kópbalaly analardyń ózderi jumysqa ornalasa alady.

Ortalyqta shaǵyn balabaqsha uıymdastyrý jáne jyl boıy semınar-trenıngter men sheberlik sabaqtaryn ótkizý kózdelip otyr. «Asyl ana» áleýmettik jobasy kópbalaly analardyń óz isin júrgizý áleýetin ashýǵa, olardyń óz múmkindikterin damytýǵa, sondaı-aq ulttyq qolónershilikti zamanaýı trendke aınaldyrýǵa yqpal etedi dep kútilip otyr.

Sheberlik sabaqtaryna qatysý týraly saýaldarǵa 8775 9976866, 87758604141 nómirlerinen jaýap alýǵa bolady.