Elordanyń kommýnaldyq qyzmeti karantın kezinde de jumysyn toqtatpaıdy

NUR-SULTAN. QazAqparat - Nur-Sultan qalasynyń kommýnaldyq qyzmeti qoǵamdyq kólik aıaldamalaryn, jol jıekterin, kósheler men aýlalardy kúrtik qardan tazalap, úzdiksiz kólik baılanysyn qamtamasyz etý úshin kúsheıtilgen tártipte jumys isteýde, dep habarlaıdy QazAqparat tilshisi.

«Kommýnaldyq qyzmettiń barlyq jumysshylary qala tirshiligi júıesiniń tolassyz jumys isteýin qamtamasyz etýge baǵyttalǵan. Kúndelikti qar tazalaý men tazalyq sharalaryna 1400 birlik tehnıka men 1600 adam jumyldyrylǵan. Osy kúnge deıin 6 mln 500 myń tekshe metr qar shyǵaryldy»,- deıdi «Astana tazalyq» mamandary.

Elorda ákimdigi baspasóz qyzmetiniń málimetinshe, karantın engizilgen sátten bastap, qaýipsizdik sharalary kúsheıtilip, qoǵamdyq jerler men kósheler, aýla ishi men jaıaý júrginshiler jolyn tazalaý qadaǵalanýda. Qala syrtynda turatyn jumysshylar kedergisiz jumystaryna qatynaýda. Olar tólqujattyq jáne medıtsınalyq baqylaýdan ótkennen keıin ǵana isterine kirisedi. Sondaı-aq, jumysshylar maska, qolǵap jáne basqa da qorǵanys quraldarymen tegis qamtylǵan.

Nur-Sultan qalalyq kólik jáne jol-kólik ınfraqurylymyn damytý basqarmasynyń aqparatyna qaraǵanda, elorda kóshelerinde maýsymdyq jóndeý jumystary áli bastala qoıǵan joq.

«Degenmen, keı jerlerdegi shuńqyr joldar jóndelip jatyr. Jalpy, qalalyq kólik joldaryn jóndeý jumysy sáýir aıynyń sońynda bastalady», - dep atap ótedi basqarmadan.