Elordanyń káriz jelileri nóser jaýynǵa tótep bere ala ma

NUR-SULTAN. QazAqparat – Nur-Sultan qalasyndaǵy káriz jelileriniń nóser jaýynǵa tótep berý jaıy týraly aıtyldy, dep habarlaıdy QazAqparat tilshisi.

«Qala boıynsha 22 tazartý qurylǵysy bar. Onyń 13-i jumys jaǵdaıynda, qalǵan 9-y rezervte nemese qaıta jóndeýden ótip jatyr. Búgingi kúni bul jumysqa qatysty problema joq. Degenmen Turan dańǵyly boıyndaǵy tazartý qurylǵysyn sý shaıý qaýpi bolǵan. Atalǵan máseleni sheshý úshin ákimdik qosymsha sý sorǵysyn ornatty. Sondyqtan osy kóktemde atalǵan dańǵyldy sý shaıý qaýpi joq degen senimdemiz», - dedi qalalyq TJD tótenshe jaǵdaılardyń aldyn alý basqarmasynyń basshysy Baýyrjan Beısenqanov elorda ákimdiginde onlaın ótken baspasóz máslıhatynda.

Buǵan deıin TJD ókili elordada sý basýy múmkin ýchaskelerdi atap berdi.

«Sý tasqyny jaǵdaıy máselesi erekshe baqylaýda. Tótenshe jaǵdaıdyń aldyn alý úshin 1 sáýirde qalalyq jedel shtab quryldy. Sonymen qatar aýdandyq ákimdikterde sý tasqynyna qarsy komıssııalar jumys isteıdi, qar, aryq jáne nóser jelilerin tazalaý boıynsha keń aýqymdy profılaktıkalyq jumys júrip jatyr. 4 sáýirdegi jaǵdaı boıynsha qalada jalpy uzyndyǵy 53,7 shaqyrym bolatyn aryq tazalandy. Qazirgi ýaqytta elorda aýmaǵynda sý tasýy múmkin degen 25 ýchaske belgilendi», - dep túsindirdi spıker.

Sondaı-aq, ákimdik ótkizgen brıfıngte qala aýmaǵynan 4,5 mln tekshe metrden astam qar shyǵarylǵany aıtyldy.