Elordanyń káriz kollektorlary qurylysyna 6,75 mlrd. teńge bólindi

ASTANA. QazAqparat - Elordanyń káriz kollektorlary qurylysyna 6,75 mlrd. teńge bólindi. Bul týraly búgin «Sý tartýdyń ózekti máseleleri: Aǵyndy sýlardy tazartý. Nóser jáne drenajdy káriz» taqyrybyndaǵy halyqaralyq konferentsııada Astana qalalyq Kommýnaldyq sharýashylyq basqarmasynyń basshysy Tólegen Zakarıanov málim etti.

«Bizde 2020 jylǵa deıingi baǵdarlama bolǵan edi. Qazirgi ýaqytta ol 1 jylǵa ysyryldy. Óıtkeni, shilde aıyndaǵy nóser jaýyndar problemany kúrdelendirip jiberdi. Búgin ǵana Úkimet otyrysynda nóser kárizderi nysandarynyń qurylysyn qarjylandyrý máselesi qaraldy. Biz qazirgi ýaqytta qalada oryn alyp otyrǵan bul problemany tolyq sheshýge qajet qarjymen qamtamasyz etemiz», - dedi ol.

Onyń aıtýynsha, qalanyń barlyq derlik aýmaǵynan sýdy aıdap shyǵýdy qamtamasyz etetin barlyq qajetti nysandardyń tizilimi ázirlengen. Sonymen birge osy jyldan bastap iske qosylatyn baǵdarlama da daıyn.

«Jumystar 2017-2018 jyldary jalǵasady jáne 2018 jyldyń sońynda bul problema joıylýy tıis. Aǵymdaǵy jyly osy baǵdarlama aıasynda káriz kollektorlarynyń qurylysyna 6,75 mlrd. teńge bólindi», - dep atap ótti T. Zakarıanov.