Elordanyń Esil aýdanynda zańsyz saýda jasaǵandar 1,5 mln teńgege jýyq aıyppul tóledi

NUR-SULTAN. QazAqparat – Astanalyq polıtseıler stıhııalyq saýdaǵa jol bermeý maqsatynda reıd júrgizýdi jalǵastyryp jatyr, dep habarlaıdy QazAqparat tilshisi.

«Maýsym bastalǵaly zańsyz saýda jasaǵany úshin 204-baptyń 1-bóligine sáıkes (belgilenbegen orynda saýda jasaý) ýákiletti organ qyzmetkerleri 1 424 295 teńge somasyna 398 hattama toltyrdy (Esil aýdany boıynsha). Stıhııalyq saýdaǵa jol bermeý boıynsha reıdter jalǵasyp jatyr», - delingen Nur-Sultan qalasy polıtsııa departamentiniń QazAqparat joldaǵan saýalǵa bergen jaýabynda.

Resmı aqparatta aıtylǵandaı, «Esil» aýdany ákiminiń apparaty «Botanıkalyq baq» aýmaǵynda kásipkerlik qyzmet atqarýǵa ruqsat bere almaıdy.

«Óz qyzmetin usynǵysy keletinderge kásipkerlik bólimi balamaly nusqalardy nusqaı alady. Stıhııalyq saýda faktileriniń jolyn kesý maqsatynda Esil aýdanynyń ákimdigi jergilikti polıtsııa qyzmetkerlerimen birlesip, «Botanıkalyq baq» aýmaǵynda kúndelikti reıd ótkizedi», - deıdi vedomstvodan.