Elordanyń eldi mekenderinde hokkeı korttary ashyldy

NUR-SULTAN. QazAqparat - Altaı Kólginov elorda aýdandarynyń aýlalyq aýmaqtary qalaı ózgergenin tekserdi, dep habarlaıdy QazAqparat qala ákiminiń resmı saıtyna silteme jasap.

Úrker eldi mekeninde (201 kóshesi, Esil aýdany) ámbebap alań ashyldy: fýtbol alańyn jyldyń sýyq mezgilinde hokkeı kortyna aýystyrýǵa bolady. Bul kortta balalar hokkeı oınap qana ǵoımaı, konkımen de syrǵanaı alady. Sondaı-aq trenajerler ornatylyp, workout aımaǵyn jabdyqtaldy. Árbir osyndaı keshen ınklıýzıvtik elementtermen jabdyqtalǵan. Erekshe qajettilikteri bar balalar alańdarda oınap, sportpen shuǵyldana alady.

«Memleket basshysy halyqqa Joldaýynda azamattardy buqaralyq sportpen aınalysýǵa shaqyrdy. Barlyǵy aýla sportynan bastalady. Balalar bos ýaqytynda fýtbol, hokkeı oınaýǵa, konkımen syrǵanaýǵa múmkindik alýy úshin sportpen shuǵyldanýǵa jaǵdaı jasalýy tıis. Aýlalardyń kórinisi men ne bolýy qajettigi týraly turǵyndarmen kelise otyryp sheshiledi. Qoǵamdyq keńistikti turǵyndardyń pikirin eskere otyryp damytatyn bolamyz! Aýla aýmaqtaryn abattandyrý jumystaryn odan ári jalǵastyramyz», - dedi A. Kólginov. Sondaı-aq, mundaı alańdar Gete kóshesi, 10 (Saryarqa aýdany) jáne Óndiris eldi mekeninde (Baıqońyr aýdany) ornatyldy. Bul jobalar «Samruk-Kazyna Trust» áleýmettik jobalardy damytý qorymen birlesip iske asyryldy.

«Samuryq-Qazyna» AQ Basqarma tóraǵasynyń orynbasary Álisher Pirmetov alańdardy kútip ustaý kerektigin atap ótti. Kezdesýde turǵyndar balalar alańyn ornatýǵa bólingen qarajat úshin «Samuryq-Qazyna» qoryna alǵystaryn bildirdi. Balalarǵa basketbol, voleıbol jáne fýtbol doptary berildi.