Elordanyń áskerı kolledji alǵashqy talapkerlerdi qabyldaıdy
Jańa oqý jylynyń bastalýyna bir aı qaldy. Keńes odaǵynyń Batyry, Halyq Qaharmany, armııa generaly Saǵadat Nurmaǵambetov atyndaǵy áskerı kolledj jańa mártebede alǵashqy bilim alýshylardy qabyldaýǵa daıyn. Áskerı oqý orny bıyl «Jas ulan» respýblıkalyq mektebiniń bazasynda quryldy.
Áskerı kolledjdegi oqý merzimi eki jyl on aı. Osy ýaqyt ishinde áskerı bilim alýshylar saptyq, oq atý, dene daıarlyqtarynyń negizderin meńgeredi. Sondaı-aq jeke quramdy basqarý jáne áskerı istegi avtomattandyrý jáne aqparat tehnologııalary, qarý-jaraq pen áskerı tehnıkaǵa tehnıkalyq qyzmet kórsetý, radıatsııalyq, hımııalyq jáne bıologııalyq qorǵaý áskerleriniń bólimsheleri men ınjenerlik bólimshelerdi basqarý daǵdylaryna mashyqtanady.
Áskerı bilim ordasyna 15 jastan 17 jasqa deıingi jastar túsedi. Ol úshin talapkerler kásibı-psıhologııalyq irikteýden, medıtsınalyq kýálandyrýdan ótip, dene shynyqtyrý daıarlyǵynan emtıhan tapsyrýy qajet.
Elordalyq áskerı kolledjge qujattardy qabyldaý tamyz aıynyń 1 men 5-i aralyǵynda ótedi. Talapkerler áskerı oqý ornynda emtıhan tapsyryp, konkýrs irikteýden ótedi.
Ata-anasynyń qamqorlyǵynsyz qalǵan balalarǵa, áskerı daıarlyqtyń qosymsha baǵdarlamalary boıynsha bilim berý uıymdarynyń túlekterine jeńildik qarastyrylǵan. Áskerı qyzmet ótkerý kezinde qaza tapqan, habar-osharsyz ketken nemese múgedek bop qalǵan áskerı qyzmetshilerdiń balalary, ózderi tańdaǵan mamandyǵyna sáıkes kelgen jaǵdaıda halyqaralyq olımpıadalar men ǵylymı konkýrstardyń jeńimpazdary da basym quqyqqa ıe.