Elordanyń 3 jyldyq bıýdjeti bekitildi
Elordanyń úshjyldyq bıýdjetin tanystyrǵan Astana qalalyq ekonomıka jáne bıýdjettik josparlaý basqarmasynyń basshysy Erǵalı Egemberdiniń aıtýynsha, onyń jalpy somasy 997 mlrd teńgeni quraıdy. Atalǵan somanyń 369 mlrd teńgesi 2018 jyly, 320 mlrd teńgesi 2019 jyly jáne 308 mlrd teńgesi 2020 jyly jumsalatyn bolady. Al 2018 jylǵa josparlanǵan qarajattyń 124 mlrd teńgesi áleýmettik salaǵa arnalǵan. Onyń 47 mlrd teńgesi bilim salasyna, 9,5 mlrd teńgesi jumyspen qamtý, áleýmettik qorǵaý máselelerine jumsalady. Munan bólek, shamamen 218 myń azamatqa áleýmettik kómek kórsetýge 2,8 mlrd teńge bólinip otyr. Densaýlyq saqtaý salasyna 30 mlrd teńge qarastyrylǵan. Al sport salasyna bólinetin qarajat kólemi 16,6 mlrd teńge mólsherinde bolmaq.
«Elordadaǵy qoǵamdyq tártip pen qaýipsizdikti qamtamasyz etý úshin 10 mlrd teńge bólinedi. Onyń 8 mlrd teńgesi túrli bólimshelerdiń qyzmetkerlerine jalaqy tóleýge jáne materıaldyq-tehnıkalyq qamtamasyz etýge jumsalady. 21 mlrd teńge qarajatty Jolaýshylar kóligi basqarmasyna bólý kózdelgen»,- dedi ol.
Al Avtomobıl joldary basqarmasyna 42,6 mlrd teńge jumsalady. Munan bólek, Tabıǵı resýrstar jáne tabıǵatty paıdalanýdy retteý basqarmasyna 4 mlrd, Qarjy basqarmasyna 27 mlrd, Kommýnaldyq sharýashylyq basqarmasyna 21 mlrd, Turǵyn úı basqarmasyna 4,9 mlrd, Qurylys basqarmasyna 37 mlrd teńge bólinedi.