Elordanyń 20 jyldyq mereıtoıynda qaı eldiń teatrlary óner kórsetedi

ASTANA. QazAqparat - Búgin QR Syrtqy ister mınıstrliginde elimizde tirkelgen sheteldik dıplomatııalyq korpýs ókilderine arnalǵan brıfıngte elordanyń 20 jyldyq mereıtoıyna oraı ótetin aýqymdy sharalar ataldy, dep habarlaıdy QazAqparat.

«Aǵymdaǵy jyldyń basty sharasy - elordamyzdyń 20 jyldyq mereıtoıyn atap ótý. Onyń aıasynda jetekshi shyǵarmashylyq ujymdar men uıymdardyń qatysýymen «Astanalar sherýi» atty aýqymdy halaqaralyq joba ótedi. Joba aıasynda «Astana Opera» men Beıjiń ulttyq opera teatry birlesip, Djýzeppe Pýchchınıdiń «Týrandotyn» sahnalaıdy», - QR Mádenıet jáne sport mınıstri Arystanbek Muhamedıuly.

Sonymen qatar ol sheteldik birqatar balet ujymynyń elordamyzda alǵash ret óner kórsetetindigin atap ótti.
 

«Alǵash ret Qazaqstanda «Astana mıýzıkl» teatry tanymal frantsýzdyq-kanadalyq «Notr Damm de Parı» mıýzıklin avtorymen birge alǵash ret sahnalaıdy. Marıın teatry, «American Theatre balet», Berlın opera balet teatry ózderiniń birinshi balet qoıylymdaryn usynady», - dedi ol.

Mınıstrdiń sózine qaraǵanda, elordaǵa keletin sheteldik teatr ujymdaryn óz elderi qarjylandyrady.

«Osy múmkindikti paıdalana otyryp, Italııanyń Qazaqstandaǵy Elshiligine «Eni» munaı kompanııasynyń esebinen La Scala teatrynyń saparyn uıymdastyrǵany úshin rızashylyǵymdy bildirgim keledi. Muny kóptegen tanymal teatrlardyń óz elderiniń demeýshilik qarjysy esebinen óner kórsetetindigin bildirý úshin aıtyp otyrmyn», - dedi Arystanbek Muhamedıuly.